Тошкентда мактаб ўқувчиси магнитли билакузукни ютишга мажбурланганидан кейин реанимацияга тушиб қолди. Видео
Тошкентда мактаб ўқувчиси магнитли билакузукни ютишга мажбурланганидан кейин реанимацияга тушиб қолди. Видео
Тошкент шаҳри Яшнобод туманидаги 151-мактаб ўқувчиси тенгдошларининг шафқатсиз қилмишидан сўнг мураккаб уч соатлик операцияни бошдан кечирди ва реанимацияга ётқизилди. Жабрланувчининг онаси сўзларига кўра, икки нафар мактаб ўқувчиси унинг ўғлини калтаклаш билан қўрқитиб, ичагини олти жойидан тешиб юборган металл магнитли билакузукни ютишга мажбур қилган.
Аёл содир бўлган воқеа ҳақида ижтимоий тармоқларда маълум қилди.
Унинг айтишича, воқеа мактаб ҳожатхонаси яқинида содир бўлган, у ерда номаълум синфнинг икки нафар ўқувчиси болага ҳужум қилган. Безорилардан қўрққани сабабли бола содир бўлган воқеани ота-онасига дарҳол айтмаган. У шифохонага кучли оғриқлар билан олиб келинган, шифокорлар эса металл буюмни фақат рентген тасвирида кўришган. Шундан кейингина жабрланувчи мактабда унга нисбатан нима қилишганини тан олган.
Организмга тушган билакузук бўлакларга бўлиниб, оксидланишни бошлаган. Шифокорлар уч соат давомида шошилинч операция ўтказишди — ёт жисм ичакни бирданига олти жойидан шикастлаган, шу сабабли шифокорлар аъзонинг тахминан беш сантиметрини олиб ташлашларига тўғри келган.
Ҳозирда бола реанимацияда қолмоқда, шифокорларнинг прогнозларига кўра, у ерда яна тўрт-беш кун бўлади.
Мактаб ўқувчисининг онаси ижтимоий тармоқларда видеомурожаат эълон қилиб, ота-оналарни болалар шафқатсизлиги ва тарбияси муаммосига эътибор қаратишга чақирди. Аёл ҳали ҳам шок ҳолатида эканини ва фарзандидан деярли айрилиб қолаёзганини тан олди, шунингдек, нима учун руҳий назоратга муҳтож болалар туфайли атрофдагилар азоб чекиши кераклигини сўради.
Ҳуқуқ-тартибот идоралари ва мактаб маъмуриятидан ҳозирча расмий изоҳ берилмади.