Тошкентда IMTECH 2026 халқаро форуми бўлиб ўтади
SAYS кўргазма компанияси «Инновацион материаллар ва технологиялар» форуми 2026 йилнинг 9–11 декабрь кунлари Тошкентда бўлиб ўтишини маълум қилди.
Тошкентда IMTECH 2026 халқаро форуми бўлиб ўтади
«Инновацион материаллар ва технологиялар» халқаро форуми — IMTECH 2026 — 2026 йилнинг 9-11 декабрь кунлари Тошкентда, CAEx (Central Asian Expo Uzbekistan) халқаро кўргазма маркази майдонида бўлиб ўтади.
Тадбир ташкилотчилари SAYS кўргазма компанияси (Ўзбекистон) ва «Мир-Экспо» кўргазма компанияси (Россия) ҳисобланади.
Форум таркибига тўртта ихтисослаштирилган кўргазма экспозицияси киради: саноат кимёсига бағишланган ChemTech, композит ва муҳандислик материалларига бағишланган CompositeTech, елим технологиялари ва герметизацияловчи материалларга бағишланган AdhesiveTech, шунингдек, шиша технологиялари ва меъморий шишага бағишланган GlassTech.
IMTECH турли мамлакатлардан ишлаб чиқарувчилар, ускуналар етказиб берувчилар, технология ишлаб чиқувчилар, илмий ташкилотлар, инвесторлар ва саноат корхоналарини бирлаштирувчи халқаро тармоқ платформаси сифатида лойиҳалаштирилган. Форум халқаро саноат кооперациясини ривожлантириш, ишбилармонлик алоқаларини кенгайтириш, инвестицияларни жалб қилиш, ишлаб чиқаришни маҳаллийлаштириш ва замонавий технологик ечимларни жорий этишга қаратилган.
Форумнинг ишбилармонлик дастуридан тармоқ конференциялари, панель мунозаралари, инновацион лойиҳалар тақдимотлари, B2B музокаралари ҳамда бизнес, давлат тузилмалари, тармоқ уюшмалари ва халқаро ташкилотлар вакилларининг учрашувлари ўрин олган.
Ташкилотчилар IMTECH 2026 кўргазмасини замонавий материаллар, кимёвий технологиялар, композит материаллар ва ишлаб чиқаришни автоматлаштиришни бирлаштирган Марказий Осиёдаги энг йирик ихтисослаштирилган майдон деб атамоқда.
Кимё, қурилиш ва ишлаб чиқариш тармоқларидан хомашё, ускуналар ва тайёр маҳсулотлар ишлаб чиқарувчилар, тармоқ уюшмалари, илмий-тадқиқот ташкилотлари ва инжиниринг компаниялари иштирок этиши кутилмоқда.