Тошкентда бешта автобус йўналиши ҳаракати вақтинча ўзгартирилди
Автобуслар йўналиши Шаҳрисабз ва Истиқбол кўчалари кесишмасида автобуслар учун махсус йўлак (БРТ) қурилиши сабабли вақтинча
Тошкентда бешта автобус йўналиши ҳаракати вақтинча ўзгартирилди
Тошкент шаҳридаги Шаҳрисабз ва Истиқбол кўчалари кесишмасида автобуслар учун махсус йўлак (БРТ) қурилиши сабабли бешта автобус йўналишининг ҳаракати вақтинча ўзгартирилди. Бу ҳақда Тошкент шаҳар транспорт ва йўл-транспорт инфратузилмасини ривожлантириш бош бошқармаси хабар берди.
Маълум қилинишича, Шаҳрисабз ва Истиқбол кўчалари кесишмасида чапга бурилиш ҳаракати вақтинча чекланди. Шу сабабли шаҳар марказидан ҳаракатланадиган 2, 26, 37, 68 ва 93-сонли автобуслар бир томонлама тартибда Шаҳрисабз, Махтумқули ва С. Азимов кўчалари орқали йўналтирилмоқда.
Қайд этилишича, ҳудудда транспорт оқими ортиши ва тирбандликлар юзага келиши мумкин. Шу сабабли автобусларнинг қатнов оралиғи узайиши, шунингдек, йўналишлар ҳаракатига қўшимча ўзгартиришлар киритилиши эҳтимоли бор.
Йўловчилардан сафарларини олдиндан режалаштириш сўралди.