Тошкентда автобусда йўл ҳақини тўламай, назоратчига қаршилик кўрсатган йигит 3 суткага қамалди
Тошкентда автобусда йўл ҳақини тўламай, назоратчига қаршилик кўрсатган ва жанжал чиқарган йўловчи 3 суткага қамалди. Транспорт вазирлиги назоратчилар ҳокимият вакили ҳисобланиши ва уларга қаршилик кўрсатиш жавобгарликка сабаб бўлишини эслатди.
Тошкентда автобусда йўл ҳақини тўламаган, назоратчига қаршилик кўрсатган йигитга 3 суткага қамоқ жазоси берилди
Тошкент шаҳрида автобусда йўл ҳақини тўламасдан, “Тошкент шаҳар йўловчи ташишни мониторинг ва назорат қилиш” назоратчиларининг қонуний талабларига бўйсунмаган ва можаро чиқарган йўловчига нисбатан маъмурий қамоқ жазоси тайинланди, дея хабар бермоқда.
Маълум қилинишича, 15-август куни Чилонзор туманида ўтказилган рейд тадбири вақтида фуқаро М. М. автобусдан тушганида назоратчилар ундан йўл ҳақи тўланганини тасдиқловчи ҳужжатни сўраган. Бироқ йўловчи турли важлар келтириб, жамиятда юриш-туриш қоидаларини бузган ва назоратчининг талабларини бажаришдан бош тортган.
Фуқаронинг шахсига аниқлик киритиш жараёнида у жанжал кўтариб, назоратчига нисбатан куч ишлатишга уринган. Ушбу ҳолат назоратчининг боди-камерасига ёзиб олинган, дейилади хабарда.
24-сентабр куни жиноят ишлари бўйича Чилонзор туман судида бўлиб ўтган очиқ суд мажлисида М. M.ga нисбатан 3 сутка маъмурий қамоқ жазоси белгиланди.
“Тошкент шаҳар йўловчи ташишни мониторинг ва назорат қилиш” ДМ назоратчилари ҳокимият вакили ҳисобланади. Уларга ҳужум қилиш, зўравонлик билан таҳдид солиш ёки ҳақорат қилиш қонунчиликка мувофиқ жавобгарликка сабаб бўлади, дея эслатди вазирлик.
Маълумот учун, 1-сентабрдан бошлаб йўловчилар автобусга чиқиши билан йўл ҳақини тўлашлари шарт. Акс ҳолда йўловчи чиптасиз ҳаракатланаётган деб ҳисобланади ва унга нисбатан Маъмурий жавобгарлик тўғрисидаги кодекснинг 144-моддаси 5-қисмига асосан жарима (44 минг сўм) қўлланади.
Назоратчилар энди автобус ичида ҳам йўлкирани тўлаш бўйича мониторинг олиб боради, шу пайтгача улар бекатларда текширув ўтказган.