Тошкент зооҳимоячилари болани мушукка шафқатсиз муносабатда бўлишга жалб қилган катталарни жавобгарликка тортишни талаб қилмоқда. Видео

Тошкент зооҳимоячилари болани мушукка шафқатсиз муносабатда бўлишга жалб қилган катталарни жавобгарликка тортишни талаб қилмоқда. Видео

Ижтимоий тармоқларда катталар мушукнинг бўйнига арқон боғлаб, уни болага бераётгани акс этган видео тарқалди. Тасвирда жонзот қаршилик кўрсатиб, қутулишга ҳаракат қилаётгани, бола эса бу вақтда арқонни тортаётганини кўриш мумкин. Ушбу ролик Тошкент зооҳимоячиларининг эътирозларига сабаб бўлди, улар ҳуқуқни муҳофаза қилувчи органларни содир бўлган воқеани текширишга ва катталарнинг хатти-ҳаракатларига ҳуқуқий баҳо беришга чақиришди.

Бу ҳақда Animal Life in Uzbekistan ҳамжамияти вакиллари маълум қилиб, катталар содир бўлаётган воқеани тўхтатмагани, аксинча, унга болани жалб қилганига эътибор қаратишди.

Зооҳимоячиларнинг фикрича, бу каби ҳолатлар болаларда ҳайвонларга бўлган муносабат ҳақида бузилган тасаввурни шакллантириши мумкин. Улар айнан катталар болаларда ҳайвонларга нисбатан инсонпарварлик муносабатини шакллантириши ва шафқатсизликка йўл қўймаслиги кераклигини таъкидладилар.

Ҳамжамият вакиллари содир бўлган воқеа ҳолатларини аниқлашга ва агар қонуний асослар мавжуд бўлса, айбдорларни Ҳуқуқбузарликлар тўғрисидаги кодекснинг ҳайвонларга нисбатан шафқатсиз муносабатда бўлганлик учун жазони назарда тутувчи 111-моддаси бўйича жавобгарликка тортиш масаласини кўриб чиқишга чақирдилар.

Мақола чоп этилган вақтда ҳуқуқни муҳофаза қилувчи органлардан расмий муносабат билдирилмаган эди.

Аввалроқ Тошкент метрополитенининг "Космонавтлар" бекатида изларга тушиб қолган мушук қутқарилган эди. Метрополитен ходимлари вазиятни дарҳол назоратга олишган, шундан сўнг тоннель иншоотлари хизматининг техник ёрдам устаси мушукни излардан хавфсиз олиб чиққан.