Тошкент халқаро молия маркази WAIFC нинг тўлақонли аъзосига айланди
**Тошкент халқаро молия маркази WAIFC’нинг тўлақонли аъзосига айланди**
Тошкент халқаро молия маркази (ТХММ) Халқаро молия марказлари жаҳон альянсига (WAIFC) тўлақонли аъзо сифатида қабул қилинди ва ўзининг расмий фаолияти бошланишидан олдин илк халқаро эътирофга сазовор бўлди. WAIFC Кенгаши ушбу қарорни 15 сентябрь куни Пусан шаҳрида бўлиб ўтган йиғилишда қабул қилди.
WAIFC бутун дунё бўйлаб молия марказларини, жумладан, Лондон, Франкфурт, Люксембург, Дубай, Гонконг, Пусан ва Астанани бирлаштиради. Гуруҳ халқаро молия марказлари ўртасидаги ҳамкорлик платформаси бўлиб хизмат қилади ҳамда молия соҳасида тажриба ва илғор амалиётлар билан алмашишни рағбатлантиради.
Тошкент 2022 йилдан буён WAIFC фаолиятида иштирок этиб келади ва бунгача кузатувчи мақомига эга эди. Тўлақонли аъзо бўлиш унинг Альянсдаги ролини кенгайтиради ва тадқиқотлар, экспертлик дастурлари ҳамда ҳамкорлик ташаббусларидан фойдаланиш имкониятини беради.
Тақдим этилган маълумотларга кўра, тўлақонли аъзолик Тошкент халқаро молия марказига молиявий тартибга солиш, инвесторларни ҳимоя қилиш ва замонавий молиявий воситаларни яратиш каби соҳаларда халқаро тажрибадан фойдаланиш имконини беради.
ТХММ, шунингдек, Альянс доирасида амалга ошириладиган қўшма тадқиқот ва экспертлик дастурларига қўшилиши мумкин бўлади, бу эса бошқа аъзо молия марказлари билан тажриба алмашиш имкониятларини яратади.
Ушбу аъзолик Тошкент халқаро молия марказининг расмий иш бошлаши арафасидаги илк халқаро эътирофидир. Бу, шунингдек, марказнинг халқаро молиявий ҳамжамиятга интеграциялашувига ва нуфузли молиявий марказлар билан ҳамкорликни мустаҳкамлашга ёрдам бериши кутилмоқда.
ТХММни ривожлантириш Ўзбекистоннинг янги молиявий платформа яратиш ҳамда халқаро молия институтлари ва бозорлари билан алоқаларни чуқурлаштириш борасидаги саъй-ҳаракатларининг бир қисмидир.
WAIFC’нинг тўлақонли аъзоси сифатида Тошкент халқаро молия маркази бошқа аъзо молия марказлари билан биргаликда Альянс фаолиятида иштирок этади ва унинг молия секторини ривожлантириш, тадқиқотлар ва тажриба алмашиш борасидаги қўшма ишларига ҳисса қўшади.