Тошкент вилояти малина етиштириш бўйича Сербия тажрибасини ўрганади
Тошкент вилояти ҳокимлиги Сербиянинг FLORIVA BERRY компанияси билан малина плантацияларини ташкил этиш, маҳсулотни қайта ишлаш ва экспортни ривожлантиришни муҳокама қилди.
Тошкент вилояти малина етиштириш бўйича Сербия тажрибаси билан танишади
Тошкент вилояти ҳокими ўринбосари Жаҳонгир Мамажонов Сербиянинг Иваница шаҳрида FLORIVA BERRY компанияси вакиллари билан музокаралар ўтказди. Учрашув давомида томонлар ҳудудда замонавий малина плантацияларини ташкил этиш, замонавий агротехнологияларни жорий қилиш, шунингдек, резавор мевалар етиштириш ва қайта ишлаш соҳасида ҳамкорликни кенгайтириш истиқболларини муҳокама қилдилар.
Сербия компанияси вакиллари FLORIVA BERRY малина етиштириш бўйича 50 йилдан ортиқ тажрибага эга эканлигини маълум қилишди.
Компания лаборатория текширувларидан ўтган, вируслардан холи ва профессионал плантациялар учун мўлжалланган сертификатланган экиш материалини ишлаб чиқаради.
Экиш материалини етказиб беришдан ташқари, компания плантацияларни барпо этишдан тортиб маҳсулот етиштиришгача бўлган тўлиқ ишлаб чиқариш циклини ташкил этиш бўйича консалтинг хизматларини ҳам кўрсатади.
Учрашувда FLORIVA BERRY саноат усулида ишлаб чиқариш ва янги сотув бозорларига чиқиш учун мўлжалланган малина навларини тақдим этди. Улар орасида Willamette ва Enrosadira навлари бор.
Бундан ташқари, компания Loch Ness, Ponca, Black Satin, Triple Crown, Chester, Dana ва Black Gem навларидаги маймунжон кўчатларини намойиш этди.
Компания маълумотларига кўра, FLORIVA BERRY малина навларини турли иқлим шароитларида синовдан ўтказган ва МДҲ мамлакатларида ушбу экинни етиштириш бўйича амалий тажрибага эга. Компания, шунингдек, профессионал ишлаб чиқарувчилар, инвесторлар ва улгуржи харидорлар билан ҳамкорлик қилади.
Томонлар Тошкент вилоятида қўшма лойиҳаларни амалга ошириш имкониятларини муҳокама қилдилар. Кўриб чиқилаётган йўналишлар қаторида замонавий малина плантацияларини ташкил этиш, юқори ҳосилли навларни жорий қилиш, етиштирилган маҳсулотни чуқур қайта ишлаш ва экспортга йўналтирилган товарлар ишлаб чиқариш ўрин олган.
Музокаралар якунида томонлар ҳамкорликни ривожлантириш, мавжуд имкониятларни ўрганиш ҳамда резавор меваларни етиштириш ва қайта ишлаш соҳасида истиқболли лойиҳаларни амалга ошириш бўйича кейинги амалий қадамларни белгилаб олдилар.