Тошкент шаҳрида яшил ҳудудлар сақлаб қолиниши шарт – Урбанизация миллий қўмитаси

Тошкент шаҳрида яшил ҳудудлар сақланиб қолиши лозим – Урбанизация миллий қўмитаси

Урбанизация ва уй-жой бозори миллий қўмитаси Тошкент шаҳридаги айрим яшил ҳудудлар ўрнида автотураргоҳ қурилиши ҳамда жамоат парки режалаштирилган ҳудудларнинг ауксион савдоларига чиқарилгани ҳақидаги хабарларга муносабат билдирди.

Қўмита шаҳар марказидаги мавжуд яшил майдонлар камайиши, аҳоли сайр қилиши ва дам олиши учун қулай жамоат жойлари ўрнида конструктив қурилишлар амалга оширилиши мутлақо мақсадга мувофиқ эмаслигини таъкидлади.

«Автотураргоҳлар ташкил этишда кўкаламзор майдонлар қисқаришига ҳамда пиёдалар учун яратилган шароитлар ёмонлашишига йўл қўйилмаслиги керак», – дейилади баёнотда.

Шунингдек, «Наврўз» боғига тегишли кўчмас мулк обьектларидан бирининг ер майдонида ҳукумат қарорига мувофиқ жамоат парки барпо этилишини таъминлаш зарурлиги қайд этилган.

Миллий қўмита Тошкент шаҳридаги мавжуд яшил ҳудудлар қисқаришининг олдини олиш, жамоат парки учун белгиланган ҳудудни сақлаб қолиш, ундан фақат белгиланган мақсадларда фойдаланиш ва аҳоли манфаатларини таъминлаш шарт, деган фикрда эканини билдирган.

Тошкент шаҳар ҳокимлиги Алишер Навоий номидаги миллий кутубхонанинг орқа ҳудудида жойлашган 1,3 гектарлик ер участкасида давлат-хусусий шериклик асосида автотураргоҳ қуришни режалаштирмоқда. Тошкент шаҳар ҳокими Шавкат Умурзоқовнинг тегишли қарори қабул қилинган.

Ер участкаси 514 млн сўм билан электрон ауксионга чиқарилади. Ер участкасини 10 йил муддатга оладиган хусусий шерик 10 млрд сўмлик инвестиция киритиши керак бўлади.

Шартларга кўра, автотураргоҳда ҳар бир автомобилдан олиниши лозим бўлган тўловларнинг 15 фоизи давлат шеригига, 5 фоизи эса «Пуллик тўхташ жойи» операторига ўтказиб берилади.

Ҳукумат янги хусусийлаштириш дастури доирасида Тошкент шаҳри Юнусобод тумани Матонат маҳалласи, Шароф Рашидов кўчасидаги иккита давлат обьектини сотувга чиқарган. Бу ерлар иккита лотда электрон савдога қўйилган.