Тошкент шаҳар ҳокимлиги «Пахтакор»га 5 млрд сўм ажратади
Тошкент шаҳар ҳокимлиги шаҳар Ривожлантириш жамғармасидан «Пахтакор» футбол клубига 5 млрд сўм ажратишни маъқуллади. Маблағлар тасдиқланган смета бўйича харажатларга йўналтирилади.
Тошкент ҳокимлиги «Пахтакор»га 5 млрд сўм ажратади
Тошкент ҳокими Шавкат Умурзоқов 2026 йил 29 октябрда «Пахтакор» футбол клубига 5 млрд сўм ажратиш тўғрисидаги қарорни имзолади. Молиялаштириш пойтахт ҳокимлиги ҳузуридаги Шаҳарни ривожлантириш жамғармаси маблағлари ҳисобидан амалга оширилади.
Ҳужжатда «Пахтакор» ФК» МЧЖга клубнинг тасдиқланган сметасига мувофиқ харажатларни қоплаш учун маблағ ўтказиш назарда тутилган.
Ёшлар сиёсати, ижтимоий ривожлантириш ва маънавий-маърифий ишлар бўйича ҳоким ўринбосари, шунингдек, Тошкент шаҳар ҳокимлиги «Муниципал активларни бошқариш маркази» ДУКнинг таклифи пул ажратишга асос бўлди.
Қарорга кўра, ҳокимнинг молия, иқтисодиёт ва камбағалликни қисқартириш масалалари бўйича биринчи ўринбосари Даулетияр Худайбергеновга «Toshkent Invest kompaniyasi» АЖ кузатув кенгаши муҳокамасига клубга 5 млрд сўм ўтказиш тўғрисидаги таклифни киритиш топширилди. Бундан ташқари, у компания билан биргаликда ушбу суммани Тошкентни ривожлантириш жамғармаси маблағларидан ажратилишини таъминлаши керак.
Аҳадим Раззоқов раҳбарлик қилаётган Муниципал активларни бошқариш марказига ажратилаётган маблағлар ҳисобидан устав фондидаги ўз улушини ошириш ва улардан мақсадли фойдаланишни таъминлаш топширилди.