Тошкент прокуратураси уйидан мажбурий кўчирилганини билдирган фуқаролар мурожаатини назоратга олди
Тошкент шаҳар прокуратураси Яккасарой туманида уй-жойни мажбурий бўшатиш билан боғлиқ можаро юзасидан ижтимоий тармоқларда тарқалган мурожаатни назоратга олди.
Прокуратура маълумотларига кўра, фуқаро Рустам Паянов ва бошқалар ўзларига тегишли уйдан мажбурий равишда чиқариб юборилганини билдириб мурожаат йўллаган. Шундан сўнг Тошкент шаҳар прокуратураси ва ҳокимлик вакиллари воқеа жойига чиқиб, мурожаат муаллифлари ҳамда "Мега Логистисс Сервисе" МЧЖ вакиллари иштирокида ҳолатни ўрганган. Томонлардан аризалар қабул қилиб олинган.
Мазкур мурожаат Тошкент шаҳар прокуратураси томонидан назоратга олинган бўлиб, ўрганиш якунлари бўйича қонуний қарор қабул қилиниши таъминланади.
Аввалроқ Тошкент шаҳар ИИББ Яккасарой туманидаги уй-жойни мажбурий бўшатиш вақтида юзага келган можаро тафсилотларини очиқлаган эди. Унга кўра, фуқаролик ишлари бўйича суднинг қарори асосида уй эгалари фойдасига 2 миллиард 280 миллион сўмдан ортиқ компенсация тўланган ва уларнинг мулкка эгалик ҳуқуқи тугатилган.
Бироқ уйда рўйхатда турган Рустам Паянов ва бошқалар тўланган компенсация миқдоридан норози бўлиб, уларга яна 1 миллиард 135 миллион сўмдан ортиқ маблағ тўланиши кераклигини билдирган ҳамда уйни бўшатишдан бош тортган.
2026-йил 26-март куни мажбурий ижро ҳаракатлари вақтида юзага келган можаро чоғида 1985-йилда туғилган фуқаро А.А. жамоат тартибини бузганликда айбланиб, майда безорилик учун 10 сутка маъмурий қамоқ жазосига ҳукм қилинган.
Шундан сўнг Рустам Паянов ва бошқалар ижтимоий тармоқларда ўзлари уйдан мажбурий чиқариб юборилганини билдириб мурожаат йўллаган. Эндиликда мазкур мурожаат Тошкент шаҳар прокуратураси томонидан назоратга олинган.