Тошкент ҳокимлиги дизайн кодни жорий этишдаги хатоларни тан олди
Тошкент ҳокимлиги дизайн кодни жорий этишда ъталаб, ҳужжатларни расмийлаштириш тартиби ва ишлар кетма-кетлиги барча ҳолатларда ҳам ўз вақтида ҳамда тушунарли изоҳланмаганиниъни тан олди. Ҳокимлик бизнес манфаатлари устувор эканини маълум қилди. Баёнотда жараённинг аҳолига таъсири ҳақида гап йўқ.
Тошкент шаҳар ҳокимлиги дизайн кодни жорий этиш жараёнида йўл қўйилган хатоларни тан олди. Ҳокимликнинг маълум қилишича, тадбиркорларнинг "конструктив, жумладан, танқидий" фикр-мулоҳазаларидан сўнг, кўчаларнинг дизайн код талабларини етказиш ва тушунтириш бўйича ёндашув қайта кўриб чиқилган.
Шаҳар ҳокимлиги матбуот хизмати хабарида айтилишича, "тескари алоқа натижалари шуни кўрсатдики, айрим ҳолларда талаблар, ҳужжатларни расмийлаштириш тартиби ва бажариладиган ишлар кетма-кетлиги ўз вақтида ва етарлича тушунарли тарзда изоҳланмаган. Бу эътирозлар ўринли деб топилди ва келгуси ишларда инобатга олинади".
Қолган масалалар туман ҳокимликлари ва мутасадди ташкилотлар билан биргаликда индивидуал тарзда кўриб чиқилиши таъкидланди.
11-майдан 26-июлга қадар дизайн кодни жорий этиш лойиҳаси пойтахтнинг 56 та кўчасидаги 3230 га яқин тадбиркорлик субьектини қамраб олди. Улардан 509 нафари фасадлар кўринишини ўзгартириб бўлган, яна 2627 нафари эса бу ишни якунламоқда.
Бундан ташқари, Ташкент Инвест компанияси, Рақобатни ривожлантириш ва истеъмолчилар ҳуқуқларини ҳимоя қилиш қўмитаси ҳамда ҳокимлик ҳузуридаги Рақамли ривожланиш департаменти экспертлари иштирокида 18 та реклама-ишлаб чиқариш компанияси мутахассислари ўқитилди.
Ҳокимликнинг қайд этишича, "вазифамиз шунчаки фасадларни ягона талабларга мослаштириш эмас, балки бу жараённи тадбиркорлар учун тушунарли ва адолатли ташкил этишдир. Дизайн код бизнес учун асоссиз қийинчиликлар яратмасдан, пойтахтимиз қиёфасини яхшилаши лозим".
Баёнотда дизайн код жорий этилишининг аҳолига таъсири ҳақида тўхталинмаган. Ҳолбуки, кўп ҳолларда фасадларни ўзгартириш жараёни (жумладан, иккинчи қават деразаларини қисман тўсиб қўядиган панелларни ўрнатиш, биринчи қаватларга платформа ва қўшимча хоналар қуриб олиш кабилар) тўғридан-тўғри аҳоли манфаатларига дахл қилмоқда.
Феврал ойида халқ депутатлари Тошкент шаҳар кенгаши дизайн кодни жорий этиш тўғрисидаги ҳужжатни тасдиқлаган эди. Унда жамоат жойларининг турлари ва чегаралари, уларни режалаштириш бўйича кўрсатмалар, шаҳар дизайни элементлари ҳамда тижорат кўчмас мулк обьектларини жойлаштириш қоидалари, визуал яхлитликни шакллантириш ва ҳатто дарахтлар ҳамда буталарни танлаш кўзда тутилган.
Ҳужжатнинг кучга кириши 17-майдан кутилаётган бўлса-да, ўтган йилнинг ноябр ойидаёқ шаҳардаги тадбиркорларнинг пешлавҳалари олиб ташлана бошлаган эди. Бунга сабаб сифатида реклама жойи паспортининг йўқлиги (гарчи майдони 1 кв метргача бўлган пешлавҳалар ташқи реклама обьекти ҳисобланмаса-да), шунингдек, савдо ва хизмат кўрсатиш корхоналари фасадларини дизайн кодга мувофиқлаштириш зарурати кўрсатилди.
Март ойидан бошлаб ҳокимликлар "рейдлар"ни кучайтирди, бу эса бизнеснинг оммавий норозилигига олиб келди. Тадбиркорлар босимлар, пешлавҳаларнинг мажбурий демонтаж қилиниши туфайли кўрилган зарарлар ва электр энергиясининг ўчириб қўйилишидан шикоят қилди. Бу ҳолатларни кейинчалик Ўзбекистон бизнес-омбудсмани девони ҳам тасдиқлади. Апрел ойида девон шаҳар кенгашининг дизайн код тўғрисидаги қарорини қайта кўриб чиқиш бўйича хулоса киритди.
Бизнес ҳамжамияти конструктив мулоқотнинг, олдиндан огоҳлантиришларнинг ҳамда конструксияларни жойлаштириш бўйича аниқ белгиланган қоидаларнинг йўқлигини асосий муаммолар сифатида кўрсатди. Тадбиркорлардан бири уни бир кеча-кундузнинг ўзида фасадни уч марта ўзгартиришга мажбур қилишганини айтиб берганди.
Май ойи бошида Шавкат Мирзиёев ҳузурида ўтказилган йиғилишда корхона номи ва унинг фаолият тури ёзилган пешлавҳаларни реклама тоифасидан чиқариш масаласи муҳокама қилинган.