Тоқаев Каспийдаги фожиадан кейин Бош штаб бошлиғи ва Ҳарбий-денгиз кучлари бош қўмондонини лавозимидан бўшатди
Тоқаев Каспийдаги фожиадан кейин Бош штаб бошлиғи ва Ҳарбий-денгиз кучлари бош қўмондонини лавозимидан бўшатди
Қозоғистон Президенти Қасим-Жомарт Тоқаев Мудофаа вазирлигида кадрлар алмашинувини давом эттирмоқда. Бу сафар бир йўла уч нафар юқори мартабали ҳарбий — Бош штаб бошлиғи Қаниш Аубакиров, мудофаа вазири ўринбосари Алмаз Жумакеев ва Ҳарбий-денгиз кучлари бош қўмондони Қанат Ниязбеков ўз лавозимларидан маҳрум бўлди.
Аубакиров Бош штабни шу йилнинг январь ойида бошқарган, Жумакеев баҳорда вазир ўринбосари этиб тайинланган, Ниязбеков эса 2025 йилнинг августидан буён ҲДКга раҳбарлик қилиб келаётган эди. Уларнинг барчаси ўз лавозимларида бир йилдан камроқ вақт ишлади.
Янги истеъфолар Каспий денгизида ҳарбий машғулотлар вақтида 14 нафар ҳарбий хизматчи ҳалок бўлган фожиадан кейин Қозоғистон Мудофаа вазирлигидаги кадрлар ўзгаришининг давоми бўлди.
Президент армия раҳбарияти аскарларнинг интизоми ва хавфсизлиги учун бевосита жавобгар эканини таъкидлади.
Ўтган ҳафтада Тоқаев мудофаа вазирини лавозимидан озод қилган ва Қуролли Кучларни ислоҳ қилиш бўйича топшириқ берган эди. Президент бундан аввал ҳам армияда интизом ва хавфсизликни кучайтириш зарурлигини таъкидлаб, ҳарбий тузилмалар раҳбарияти зиммасига ҳарбий хизматчиларнинг ҳаёти ва соғлиғи учун жавобгарликни юклаган эди.