“Толибон” хусусий университетларда ҳуқуқшунослик ва яна иккита йўналишни ёпмоқчи

“Толибон” хусусий олийгоҳларда ҳуқуқшунослик, сиёсацҳунослик ва халқаро муносабатлар йўналишларини бекор қилмоқда.

“Толибон” ҳаракати Афғонистондаги хусусий университетларга ҳуқуқ, сиёсацҳунослик ва халқаро муносабатлар бўйича ўқув дастурларини босқичма-босқич тугатишни буюрди. Бу ҳақда “Ҳашти Субҳ Даилй” нашри қўлга киритган ҳужжатда маълум қилинган.

Ҳужжатда айтилишича, ушбу қарор “Толибон” Раҳбарлик кенгаши томонидан муҳокама қилиниб, тасдиқланган. “Толибон” ўз қарорини икки асосий сабаб билан изоҳлаган:

* Мазкур факултетларга талабаларнинг қизиқиши пастлиги.

* Битирувчилар учун етарли иш ўринларининг мавжуд эмаслиги.

Қарорга кўра, хусусий университетларга ушбу йўналишлар ўрнига муқобил дастурларни таклиф қилиш топширилган. Шунингдек, Академик дастурларни ривожлантириш бошқармаси ҳам мос келадиган янги йўналишларни таклиф этиши лозим.

Янги таклиф этиладиган йўналишлар кўпроқ абитуриентларни жалб қилиши ва битирувчиларга кенгроқ иш имкониятларини тақдим этиши керак. Тиббиёт ва стоматология йўналишларига бу тақиқ таъсир қилмайди.

Аввалроқ “Толибон” янги қонун билан Афғонистонда барча турдаги намойишларни тақиқлагани ҳақида хабар берилган эди. Ҳайбатуллоҳ Охундзода томонидан тасдиқланган “Полиция қонуни” хавфсизлик кучларининг вазифаларини кенгайтириб, ходимлар ва аҳоли учун бир қатор қатъий чекловлар ҳамда қоидаларни белгилаб берган.