“Толибон” Покистонни ҳарбий амалиёт ўтказмаслик ҳақида огоҳлантирди ва Саудияни воситачиликка чақирди
“Толибон” Покистонни ҳарбий амалиёт ўтказмаслик ҳақида огоҳлантирди ва Саудияни воситачиликка чақирди
“Толибон” матбуот котиби Забиҳуллоҳ Мужоҳид Покистонни Афғонистон ҳудудида ҳарбий амалиётлар ўтказмаслик ҳақида огоҳлантирди. Шу билан бирга, у Исломободнинг Афғонистон ҳудудидан жангарилар ҳужумлар учун фойдаланмоқда, деган айбловларини рад этди ва Саудия Арабистонини воситачиликка чақирди.
Ал Арабия Энглиш телеканалига берган интервюсида Мужоҳид агар Покистон мамлакатга зарбалар берса, Афғонистон ўз суверенитетини ҳимоя қилишини айтди.
“Агар Покистон Афғонистон ҳудудига бостириб кириш учун 51-моддани рўкач қилса, Афғонистон ўз юртини ҳимоя қилиш ҳуқуқига эга ва буни қилади”, деди у ҳамда жавоб қақшатқич бўлишидан огоҳлантирди.
Мужоҳид Покистон армияси вакилининг аввалроқ берган интервюсидаги айбловларга жавоб қайтарди. Покистон расмийси Афғонистон ҳудуди жангариларни ёллаш, тайёрлаш ва қуроллантириш учун ишлатилаётганини айтган эди.
“Толибон” вакили бу айбловларни рад этди. У Кобул “Таҳрики Толибон Покистон” (ТТП)га Афғонистон ҳудудида ҳаракат қилишга рухсат бермаслигини ва бошқа давлатларга қарши қуролли гуруҳларни қўллаб-қувватламаслигини билдирди.
Шунингдек, у Покистон хавфсизлик муаммоларини Афғонистонга тўнкамасдан, мамлакат ичида ҳал қилиши кераклигини айтди. Унинг таъкидлашича, ТТП ва балуж гуруҳлари билан боғлиқ тартибсизликлар “Толибон” ҳокимиятга қайтишидан олдин ҳам бўлган.
Кескинликка қарамай, Мужоҳид Афғонистон Покистон билан мулоқот қилишни хоҳлашини ва разведка маълумотларини алмашиш ҳамда ҳамкорлик механизмларини кучайтиришга чақиришини айтди.
У, шунингдек, Кобул ва Исломобод ўртасида воситачилик қилишда Саудия Арабистонининг ролини алоҳида таъкидлади. Мужоҳид Қироллик ҳар икки давлатнинг дўсти эканини ва келишмовчиликларни ҳал қилишда ижобий рол ўйнаши мумкинлигини қўшимча қилди.
Бишкек Хавфсизлик кенгашининг 2027–2028-йиллар учун доимий бўлмаган аъзоси этиб сайланган. “Толибон” ҳукумати бу имкониятдан фойдаланиб, халқаро ташкилотда ўз манфаатларини илгари суриш учун қўшни давлат билан сиёсий ва иқтисодий алоқаларни кучайтирмоқчи.