Тожикистон Халқаро жиноий суддаги иштирокини тўхтатиши мумкин

1 соат олдин

Тожикистон Халқаро жиноий суд Статутининг мамлакат учун амал қилишини тўхтатиш имкониятини ўрганмоқда.

Тегишли қарор лойиҳаси 16 сентябрь куни бўлиб ўтган навбатдан ташқари йиғилишда республика парламенти қуйи палатаси Кенгаши томонидан кўриб чиқилди.

«Халқаро жиноий суд Статутининг амал қилишини тўхтатиш тўғрисида»ги лойиҳа муҳокамаси якунларига кўра тегишли қарорлар қабул қилинди, бироқ парламент айнан нимага қарор қилингани ва бу Тожикистоннинг шартномадан чиқиши тўғрисидаги якуний қарорни англатадими-йўқми, бунга аниқлик киритмади.

Тожикистон Халқаро жиноий судни таъсис этган Рим статутини 1998 йил 30 ноябрда имзолаган ва 2000 йил 5 майда ратификация қилган. Мамлакат учун ҳужжат 2002 йил 1 июлда кучга кирган.

ХЖС энг оғир халқаро жиноятлар, жумладан, геноцид, инсониятга қарши жиноятлар ва ҳарбий жиноятларга оид ишларни кўриб чиқади. Рим статути иштирокчи давлатнинг ундан чиқиш имкониятини назарда тутади: бунинг учун БМТ Бош котибига ёзма билдиришнома юборилади, статутнинг мамлакат учун амал қилиши эса, агар давлат кечироқ муддатни кўрсатмаса, шундай билдиришнома олинганидан бир йил ўтиб тўхтатилади.

Шу билан бирга, лойиҳанинг парламент томонидан кўриб чиқилиши фактининг ўзи Тожикистон ХЖСдан чиқиб бўлганини англатмайди. Тожикистон томони кейинги қадамлар ва статут амал қилишини тўхтатиш муддатлари ҳақида ҳозирча маълум қилмади.