Тожикистон пойтахтида 30 минг томошабинга мўлжалланган янги стадион очилди
Арена ФИФА стандартлари асосида қурилган бўлиб, халқаро ўйинлар ва йирик спорт мусобақаларини қабул қилади.
Душанбеда 30 минг томошабинга мўлжалланган янги стадион очилди
21-август куни Тожикистон пойтахти Душанбе шаҳрида янги Миллий стадион ишга туширилди. Очилиш маросимида Тожикистон президенти Имомали Раҳмон ва Душанбе шаҳри раиси Рустами Имомали иштирок этишди.
Спорт мажмуаси 9,5 гектар майдонни эгаллайди ва 30 мингдан ортиқ томошабинни сиғдира олади. Икки ярусли трибуналар пастки қаватда 12 мингдан ортиқ, юқори қаватда эса 18 минг кишини жойлаштириш имкониятига эга.
Миллий стадион ФИФАнинг халқаро талабларига мувофиқ қурилган бўлиб, иккинчи халқаро тоифага киради. Бу ерда юқори даражадаги клуб ўйинлари ва халқаро мусобақаларни ўтказиш мумкин. Стадион беш қават ва ертўладан иборат бўлиб, баландлиги 33 метрга етади.
Арена марказида 105х68 метр ўлчамдаги футбол майдони жойлашган, бу халқаро ўйинларни ўтказиш бўйича ФИФА талабларига жавоб беради. Майдон атрофида 130х87 метр ўлчамдаги спорт зонаси мавжуд.
Томошабинлар учун 68 та электрон турникет ўрнатилган, стадион ҳудуди эса тўртта асосий секторга бўлинган. Бу тартиб мухлисларнинг хавфсиз ўтишини таъминлаши, одамлар тўпланишининг олдини олиши ва эвакуацияни тезлаштириши лозим.
Ўйинларни ҳар бирининг майдони 133 квадрат метр бўлган иккита катта ЛЕД экранда томоша қилиш мумкин бўлади. Объект хавфсизлигини 50 та видеокузатув камераси ва 10 та оддий камера назорат қилиб туради. Ёнғинга қарши ҳимоя тизими 1000 дан ортиқ интеллектуал ёнғин сигнализациясидан иборат.
Жамоалар учун 104 ўринли тўртта кийиниш хонаси кўзда тутилган. Расмий ва фахрий меҳмонлар учун умумий сиғими 750 кишидан ортиқ бўлган ВИП заллари жиҳозланган.
Стадион фасади алюминий панеллардан ишланган. Тунги вақтда ундан катта медиапроексия экрани сифатида фойдаланиш мумкин: проексия тизимининг майдони 30 минг квадрат метрдан ошади.
Стадион ёнида 750 дан ортиқ автомобилга мўлжалланган автотураргоҳ ташкил этилган. Ободонлаштирилган ҳудуд 3 минг квадрат метрдан ортиқ майдонни эгаллайди.
Имомали Раҳмон Тожикистон давлат мустақиллигининг 35 йиллигига бағишлаб Миллий стадионнинг очилишини мамлакат учун муносиб совға деб атади.
Янги стадион фақат футбол ўйинлари учун мўлжалланмаган. Унинг майдонида халқаро мусобақалар, кенг кўламли маросимлар, шоулар ва бошқа маданий-кўнгилочар тадбирларни ўтказиш режалаштирилган.