Тожикистон илк бор БМТ Хавфсизлик кенгаши аъзолигига ўз номзодини кўрсатди
Тожикистон илк бор БМТ Хавфсизлик кенгашига ўз номзодини таклиф қилди
Тожикистон ўз тарихида илк бор 2028–2029 йиллар учун БМТ Хавфсизлик кенгашининг муваққат аъзолигига номзодини илгари сурди. Бу ҳақда республика ташқи ишлар вазири Сирожиддин Муҳриддин Нью-Йоркда БМТ Бош Ассамблеясининг 81-сессиясида сўзлаган нутқида маълум қилди.
Ташқи сиёсат маҳкамаси раҳбари Хавфсизлик кенгашига аъзолик ташкилот Низомини сақлаб қолиш ва халқаро тинчликни қўллаб-қувватлаш борасидаги катта масъулият эканини таъкидлади. У ўз нутқида, шунингдек, Қирғизистонни 2027–2028 йиллар учун БМТ ХК муваққат аъзоси этиб сайлангани билан табриклади ва Тожикистоннинг музликларни, сув ресурсларини ҳимоя қилиш, терроризмга қарши курашиш ҳамда сунъий интеллектни ривожлантириш билан боғлиқ ташаббусларини эслатиб ўтди.
Бундан ташқари, Тожикистон Бош котиб Антониу Гутерриш томонидан 2025 йилнинг мартида бошланган "БМТ-80" ислоҳотлар жараёнини қўллаб-қувватлади. Ушбу дастур ресурсларни оптималлаштириш, эскирган мандатларни қайта кўриб чиқиш ва таркибий ўзгаришлар ҳисобига жаҳон ташкилоти фаолияти самарадорлигини оширишга қаратилган.
Эслатиб ўтамиз, аввалроқ Ўзбекистон 2035–2036 йиллар учун БМТ Хавфсизлик кенгашининг муваққат аъзолигига ўз номзодини илгари сурган эди. Бу ҳақда Президент Администрацияси раҳбари Саида Мирзиёева ўша сессияда мамлакат номидан сўзлаган нутқида маълум қилганди.