Тўрт кунда яна олтита олтин. Ўзбекистон Осиё ўйинларида тўртинчи ўринга кўтарилди
25-28 сентябрь кунлари Ўзбекистон терма жамоаси Осиё ўйинларида яна 16 та — 6 та олтин, 5 та кумуш ва 5 та бронза медалини қўлга киритди. Жамоа умумий натижани 42 та медалга етказди ва турнир жадвалида тўртинчи ўринга кўтарилди. Медалларнинг асосий манбаи кураш ва эшкак эшиш бўлди.
Тўрт кунда яна олтита олтин. Ўзбекистон Осиё ўйинларида тўртинчи ўринга кўтарилди
25-28 сентябрь кунлари Ўзбекистон терма жамоаси Аичи-Нагоядаги Осиё ўйинларида ўз ғазнасини яна 16 та медаль — 6 та олтин, 5 та кумуш ва 5 та бронза билан бойитди. 28 сентябрь якунига кўра, делегация ҳисобида 42 та соврин — 12 та олтин, 17 та кумуш ва 13 та бронза бор эди. Ўзбекистон умумий ҳисобда тўртинчи ўринга кўтарилди.
Ушбу тўрт кун ичида медалларнинг асосий қисмини байдарка ва каноэда эшиш, шунингдек, кураш спорт турлари тақдим этди — ҳар бирида олтитадан соврин.
Эшқоқчилар 25-26 сентябрь кунлари битта олтин ва бешта кумуш медални қўлга киритган бўлса, курашчилар 27-28 сентябрь кунлари тўртта олтин ва иккита бронзага эгалик қилишди. Яна иккита совринни енгил атлетикачилар, биттадан медални эса спорт гимнастикаси ва қиличбозлик вакиллари қўшиб қўйишди.
Мусобақанинг олтинчи куни Ўзбекистонга бешта медаль — битта олтин, учта кумуш ва битта бронза келтирди. Кумуш медалларнинг барча учтаси байдарка ва каноэда эшиш баҳсларида қўлга киритилди.
Аёллар ўртасида 500 метр масофага тўрт кишилик байдаркада Екатерина Шубина, Арина Танатмишева, Милана Душев-Янич ва Шаҳризода Мавлонова иккинчи бўлишди.
Яна бир кумушни Владлен Денисов 500 метрга бир кишилик каноэда қўлга киритди. Бу у учун Ўйинлардаги иккинчи соврин бўлди: бир кун аввал у Артур Гулиев билан бирга худди шу масофага икки кишилик каноэда иккинчи бўлган эди.
Куннинг учинчи кумуш медалини Шоҳсанам Шерзодова ва Нилуфар Зокирова аёллар ўртасида 500 метрга икки кишилик каноэда тақдим этишди. Шерзодова учун ҳам бу Осиё ўйинларидаги иккинчи соврин бўлди: аввалроқ у 200 метрга бир кишилик каноэда олтин медални қўлга киритган эди.
Спорт гимнастикасида Расулжон Абдураҳимов параллель бруслардаги машқларда бронза медалига сазовор бўлди. Финалда у 14,433 балл жамғарди.
Куннинг олтин медалини босқон улоқтирувчи Суҳроб Хўжаев қўлга киритди. Унинг энг яхши натижаси 74,38 метрни ташкил этди. Бу спортчи учун Осиё ўйинларидаги илк олтиндир: 2018 йилда Жакартада у 74,06 метр натижа билан учинчи бўлган, 2023 йилда Ханчжоудаги Осиё ўйинларида эса босқонни 70,79 метрга улоқтириб, яна бронза олган эди.
25 сентябрдан кейин Ўзбекистон ҳисобидаги медаллар сони 31 тага етди — 7 та олтин, 15 та кумуш ва 9 та бронза.
26 сентябрь куни Ўзбекистоннинг барча учта медалини байдарка ва каноэда эшиш вакиллари келтиришди — битта олтин ва иккита кумуш.
Шаҳриёр Маҳкамов 500 метр масофага бир кишилик байдаркада Осиё ўйинлари чемпиони бўлди. Бу унинг Осиё ўйинларидаги илк олтинидир. Аввалроқ Маҳкамов 2018 йилги Ўйинларнинг бронза ва Ханчжоудаги Осиё ўйинларининг кумуш медалини қўлга киритган эди.
Аёллар ўртасида 500 метрга бир кишилик байдарка пойгасида Арина Танатмишева кумуш медални қўлга киритди. Ушбу соврин у учун Ўйинлардаги учинчиси бўлди: 24 сентябрда у Екатерина Шубина билан бирга 500 метрга K2 баҳсларида бронза, 25 сентябрда эса тўрт кишилик байдарка таркибида кумуш олган эди.
Яна бир кумушни Владлен Денисов ва Нилуфар Зокирова 500 метрга аралаш икки кишилик каноэда қўлга киритишди. Шу тариқа, Денисов уч кун ичида шоҳсупага уч марта кўтарилди: у эркаклар ўртасида икки кишилик ва бир кишилик каноэда 500 метрга баҳсларда ҳам кумуш олган эди.
Уч мусобақа куни ичида — 24-26 сентябрь кунлари — байдарка ва каноэда эшиш Ўзбекистонга жами тўққизта медаль келтирди: иккита олтин, олтита кумуш ва битта бронза. 26 сентябрь якунига кўра, терма жамоанинг умумий натижаси 34 та совринга етди — 8 та олтин, 17 та кумуш ва 9 та бронза.
Еттинчи кун кураш бўйича мусобақаларнинг муваффақиятли бошланиши билан ёдда қолди. 27 сентябрь куни ушбу спорт тури вакиллари иккита олтин ва битта бронза медалини қўлга киритишди. Яна бир бронзани қиличбозликнинг сабля йўналиши бўйича аёллар терма жамоаси қўлга киритди.
90 кг дан юқори вазн тоифасида ярим финалда Ўзбекистоннинг икки вакили тўқнаш келди. Шоҳруҳхон Бахтиёров Бекмурод Олтибоевни мағлуб этди, Олтибоев якунда бронза медалига эга бўлди. Финалда Бахтиёров Тожикистон вакили Шакармамад Мирмамадовдан устун келиб, Осиё ўйинлари чемпионига айланди. Унинг соврини Ўзбекистоннинг Ўйинлардаги ўнинчи олтини бўлди.
Аёллар ўртасида 57 кг гача бўлган вазн тоифасида Ибодатхон Агожонова олтин медални қўлга киритди. Финалда у Хитой Тайбэйи спортчисини мағлуб этди.
Саблячи қизларнинг жамоавий баҳсларида Зайнаб Дайибекова, Фернанда Эррера, Гулистон Пердибаева ва Самира Шокирова бронза медалини қўлга киритишди. Ярим финалда Ўзбекистон Японияга 33:45 ҳисобида имкониятни бой берди.
Ушбу натижа икки терма жамоа ўртасидаги рақобат тарихи билан ҳам эътиборлидир. Ханчжоудаги аввалги Осиё ўйинларида айнан Ўзбекистон ва Япония финалда тўқнаш келишган эди. Ўшанда ўзбекистонлик саблячи қизлар 45:42 ҳисобида ғалаба қозониб, мамлакатга қиличбозлик бўйича Осиё ўйинлари тарихидаги илк олтинни келтиришган эди.
27 сентябрь якунларига кўра, терма жамоа ҳисобида 38 та медаль бор эди — 10 та олтин, 17 та кумуш ва 11 та бронза.
Эртаси куни кураш терма жамоага яна учта соврин келтирди. Аёллар ўртасида 78 кг гача бўлган вазнда Ўзбекистоннинг икки вакили ярим финалда ўзаро тўқнаш келди: Покизахон Камолиддинова Шоҳиста Назаровани мағлуб этди. Назарова бронза олди, Камолиддинова эса финалга йўл олди ва у ерда Жанубий Корея спортчисини енгиб, Осиё ўйинлари чемпиони бўлди.
Яна бир олтинни 81 кг гача бўлган вазн тоифасида Аҳрор Зиёдуллаев қўлга киритди. Ҳал қилувчи баҳсда у эронлик Рамин Аҳмадзодани мағлуб этди. Бу соврин Ўзбекистон терма жамоасининг 12-олтини бўлди.
Шу тариқа, кураш бўйича икки кунлик мусобақаларда ўзбекистонликлар олтита медаль — тўртта олтин ва иккита бронзани қўлга киритишди. Ушбу спорт турида терма жамоа қайдномасига киритилган етти нафар спортчидан олти нафари шоҳсупага кўтарилди.
Ўзбекистоннинг 28 сентябрдаги сўнгги медали енгил атлетикачи Анвар Анваровнинг бронзаси бўлди. У узунликка сакрашда 8,06 метр натижа кўрсатиб, учинчи ўринни эгаллади.
Тўққизинчи мусобақа куни якунига кўра, Ўзбекистон ҳисобида 42 та медаль — 12 та олтин, 17 та кумуш ва 13 та бронза бор эди. Бундай натижа билан терма жамоа Хитой, Япония ва Жанубий Кореядан кейин тўртинчи ўринда бораётган эди. Қозоғистон мутлақ кўрсаткич бўйича кўпроқ совринга эга эди — 45 та, бироқ бешинчи ўринда жойлашган эди, чунки медаллар жадвалида аввало олтин медаллар сони ҳисобга олинади: Ўзбекистонда 12 та, Қозоғистонда эса 9 та.