Тимур Исмаилов ички ишлар вазирининг биринчи ўринбосари этиб тайинланди
Тимур Исмаилов Ўзбекистон ички ишлар вазирининг биринчи ўринбосари — Жамоат хавфсизлиги департаменти бошлиғи лавозимига тайинланди. У бунгача Сурхондарё вилояти ИИБ бошлиғи лавозимида ишлаган. ИИВ раҳбарининг собиқ ўринбосари Бекмурод Абдуллаев 2025-йил ноябрида ишдан олинганди, у суд қилинмоқда.
Тимур Исмаилов Ички ишлар вазирининг биринчи ўринбосари лавозимига тайинланди.
Ўзбекистон Президентининг тегишли қарорига асосан, полковник Тимур Камалитдинович Исмаилов Ички ишлар вазирининг биринчи ўринбосари — Жамоат хавфсизлиги департаменти бошлиғи этиб тайинланди. Бу ҳақда вазирлик матбуот хизмати маълум қилди.
У ушбу тайинлов муносабати билан Сурхондарё вилояти ИИБ бошлиғи лавозимидан озод этилди.
Эслатиб ўтамиз, ИИВ раҳбарининг аввалги биринчи ўринбосари Бекмурод Абдуллаев 2025-йил ноябрида лавозимидан четлатилган эди.
26-январ куни эса унинг ва Жазони ижро этиш департаментининг собиқ бошлиғи Рустам Турсуновнинг ҳибсга олингани маълум бўлди.
Президент Шавкат Мирзиёев 27-январ куни бўлиб ўтган йиғилишда Ички ишлар вазирлиги тизимидаги давлат харидларида буджет маблағларини ўзлаштириш ҳолатлари аниқланганини маълум қилган эди. Унинг сўзларига кўра, 186 миллиард сўмлик маблағ талон-торож қилинган. Давлат раҳбари Бекмурод Абдуллаев ва Рустам Турсуновга нисбатан жиноят ишлари қўзғатилганини таъкидлаган.
28-июл куни судда Бекмурод Абдуллаев, Рустам Турсунов ва яна 28 нафар шахсга нисбатан қўзғатилган жиноят ишини кўриб чиқиш бошланади. Кейинроқ суд ёпиқ тарзда ўтказилиши маълум бўлди.