Техас Криста Пайкнинг муваффақиятсиз ўлим жазоси ижросидан кейин АҚШдаги илк қатлни амалга оширди
Жамал Ховарднинг адвокатлари Криста Пайкнинг муваффақиятсиз якунланган ўлим инъекцияларидан сўнг судьядан қатл этишни вақтинча тўхтатишни сўрашган эди.
Техас штатида Криста Пайкнинг муваффақиятсиз ўлим жазосидан кейин АҚШдаги илк қатл амалга оширилди
Чоршанба куни кечқурун Техасда ўлим жазосига ҳукм қилинган маҳбус заҳарли инъекция ёрдамида қатл этилди. Бу ўтган ҳафта Криста Пайкни қатл этишга бўлган муваффақиятсиз уринишдан кейин АҚШда амалга оширилган илк қатл бўлди.
BBC’нинг АҚШдаги ҳамкори CBS News хабарига кўра, 46 ёшли Жамаал Ховарднинг адвокатлари ўтган ҳафта Пайкнинг муваффақиятсиз инъекциялари фонида судьядан қатлни тўхтатишни сўрашган эди.
Бироқ, судлар уларнинг илтимосларини рад этди ва Хантсвиллдаги штат қамоқхонасида унга пентобарбиталнинг ўлимга олиб келувчи дозаси юборилди. У маҳаллий вақт билан соат 20:03 да вафот этган деб эълон қилинди.
Ховард 2000 йилда содир этган босқинчилик пайтида дўкон сотувчисини ўлдирганликда айбланиб, ўлим жазосига ҳукм қилинган эди.
Унинг адвокатлари Техас Ховардга Пайкка қўлланилган ўша дори воситасини — пентобарбитални юборишни режалаштиргани сабабли, у ҳам худди шундай хавф-хатарларга дуч келишини таъкидлашди. Шунингдек, улар Пайкнинг адвокатлари каби Техасдаги ушбу дори захирасининг сифати ёмонлашганини даъво қилишди.
Суд уларнинг апелляцияларини икки марта рад этди, АҚШ Олий суди ҳам чоршанба куни кечқурун апелляцияни қаноатлантирмади.
«Техас Теннессининг изидан боришга шошилмаслиги керак; қатлнинг кечиктирилиши бунинг олдини олган бўларди», — дея таъкидлаган Ховарднинг адвокатлари, деб хабар берди CBS.
Ховарднинг адвокатлари, шунингдек, Техас губернатори, республикачи Грег Эбботтдан қатлда қўлланиладиган дори ҳақида кўпроқ маълумот олиш учун қатлни 30 кунга қолдиришни сўрашган. Губернатор кечиктиришни маъқулламади.
Ховард Техасдаги дўконда ишлаётган 42 ёшли Вики Свартоутни отиб ташлаганида 20 ёшда эди. Ховард кассадан бир блок сигарет ва 114 доллар олган.
АҚШ ОАВларининг хабар беришича, қатл этилишидан олдин сўнгги сўзи бор-йўқлиги сўралганда, Ховард гувоҳлар хонасидан кузатиб турган Свартоутнинг оиласидан узр сўраган.
«Узримни қабул қилишингизни ва мени кечиришингизни истардим», — деди Ховард. «Содир бўлган воқеа учун узр сўрайман. Кунлардан бир кун мени кечиришни ўрганасиз деб умид қиламан».