Терроризм тузоғига тушган шахс 10 йилга озодликдан маҳрум этилди
Ижтимоий тармоқлардаги радикал тарғибот таъсирига тушиб, террористик ташкилотларга алоқадор шахслар билан мулоқот қилган ва уларни молиялаштирган Ўзбекистон фуқароси суд ҳукми билан 10 йилга озодликдан маҳрум этилди.
Терроризм тузоғига илинган шахс 10 йилга қамалди.
Қашқадарё вилоятида 1995-йилда туғилган фуқаро 2017-йилда Жанубий Корея Республикасининг нуфузли университетларидан бирига ўқишга кирган эди.
Маълумотларга кўра, у хорижда таҳсил олаётган пайтида ижтимоий тармоқлар орқали турли ғояларни тарғиб қилувчи шахсларнинг аудио ва видеоматериалларини кузатиб борган. Шунингдек, Суриядаги қуролли тўқнашувлар акс этган видеоларнинг таъсири остида радикал ғояларга мойиллик кўрсата бошлаган.
Кейинчалик у Инстаграм ва Телеграм орқали Сурия ҳудудида фаолият юритган "Тавҳид ва жиҳод катибаси" ҳамда "Ғуроба катибаси" террористик ташкилотларига алоқадор шахслар билан мулоқотга киришиб, уларга тегишли материалларни тарқатган.
Университетни тамомлаганидан сўнг ҳам Жанубий Кореяда қолган фуқаро "Ғуроба катибаси" террористик ташкилоти медиа блогерининг интернет орқали қилган даъватларига ишониб, унга пул маблағлари юборган.
2023-йил декабр ойида у Ўзбекистонга қайтиб келган. 2024-йил июл ойида эса Суриядаги жангарилар сафига қўшилиш мақсадида Туркияга борган, бироқ режасини амалга ошира олмай ортга қайтган.
Ҳуқуқни муҳофаза қилувчи органлар томонидан ўтказилган тезкор тадбир натижасида фуқаро қўлга олиниб, унга нисбатан жиноят иши қўзғатилган.
Суд ҳукми билан у Жиноят кодексининг 244¹, 244², 155² ва 155³-моддаларида назарда тутилган жиноятларни содир этганликда айбли деб топилди ва 10 йил муддатга озодликдан маҳрум қилинди.