Теннис мусобақасининг мукофот жамғармаси илк бор 100 млн доллардан ошади
АҚШ Очиқ чемпионатининг яккалик баҳслари ғолиблари 5,5 млн, финалчилар 2,8 млн долларни қўлга киритишади.
Теннис турнирининг соврин жамғармаси биринчи марта 100 миллион доллардан ошиб кетади.
Бу йилги АҚШ Очиқ чемпионатининг (УС Опен) умумий мукофот жамғармаси 108 миллион долларни ташкил этади. Бу ҳақда мусобақа ташкилотчилари хабар берди.
Яккалик баҳсларида ғолиб чиққан спортчилар 5,5 миллион доллар, финалга чиққанлар эса 2,8 миллион доллар миқдорида пул мукофотига эга бўлишади.
Жуфтлик ва аралаш жуфтлик баҳсларида чемпион бўлганларга 1 миллион доллардан, ҳал қилувчи ўйинларда иштирок этганларга эса 500 минг доллардан берилади.
Турнир 23-августдан 13-сентябргача бўлиб ўтади.
Аввалги рекорд 90 миллион доллар бўлиб, у ўтган йилги мусобақаларда қайд этилган эди.
Ўтган йилги турнирда беларуслик Арина Соболенко ва испаниялик Карлос Алкарас ғолибликни қўлга киритишган.