Тайван аҳолисига 313 доллардан пул тарқатилади
Тайван президенти Лай Чинг-те орол ҳукумати аҳолига 10 минг Тайван доллари (тахминан 313 АҚШ доллари) миқдорида пул тарқатишини эълон қилди. Президентнинг сўзларига кўра, бу ташаббус 20-августга режалаштирилган келгуси йилги бюджет муҳокамасида кўриб чиқилади.
Тайван чип ишлаб чиқариш бўйича дунёда етакчи ҳисобланади. Сунъий интеллектнинг ривожланиши ушбу чипларга бўлган талабни кескин оширди. Блоомберг хабарига кўра, Тайван иқтисодиёти 2026-йилнинг иккинчи чорагида 12,6 фоизга ўсган. Йил охиригача ўсиш кўрсаткичи 11,1 фоизга етиши кутилмоқда.
Бу сўнгги 40 йилдаги энг юқори кўрсаткичдир. Ушбу ўсиш, асосан, яримўтказгичлар ишлаб чиқариш саноати ҳисобига юз бермоқда ва у Тайван иқтисодиётининг барча тармоқларини бирдек қамраб олмаган.
“Ҳукумат фақат технология саноатига эътибор қаратиб қолмайди: рўзғор тебратаётган ҳар бир оила ҳақида ҳам ғамхўрлик қилади”, дея Лай Чинг-те сўзларидан иқтибос келтирди Блоомберг.
2025-йилда орол иқтисодиёти 8,8 фоизга ўсганда ҳам Тайван расмийлари аҳолига 10 минг Тайван долларидан тарқатган эди. Тайван аҳолиси тахминан 23 миллион кишини ташкил этади. Бир марталик тўловни неча киши олиши ҳозирча номаълум.
Аввалроқ Тайван 2027-йилда мудофаа харажатларини 16 фоизга ошириши ҳақида хабар берилганди. Натижада мамлакатнинг мудофаа бюджети илк бор 1 триллион Тайван долларидан (31 миллиард АҚШ долларидан) ошиши кутилмоқда.