“Тасодифан минани босиб олдим”. Россия—Украина урушида қатнашган наманганлик эркакка суд ҳукми ўқилди
“Тасодифан минани босиб олдим”. Россия—Украина урушида қатнашган наманганлик эркакка суд ҳукми ўқилди
Россия—Украина урушида Россия Қуролли Кучлари таркибида жангларда қатнашган наманганлик 56 ёшли эркак суд қарори билан 4 йилга озодлигидан маҳрум этилди.
“Дарё” танишган суд ҳужжатларига кўра, 1970-йилда туғилган эркак 2024-йил октябр ойида иш излаб Россиянинг Владимир вилоятига боргани ва у ерда ёғочга ишлов бериш билан шуғуллангани қайд этилган. Бироқ вақт ўтиши билан унинг мамлакатда бўлиш ҳуқуқини тасдиқловчи ҳужжатларини янгилашнинг имкони бўлмаган. 2025-йил март ойида ҳужжатлари йўқлиги сабабли полиция томонидан ушланиб, икки сутка ҳибсхонада сақланган.
Судланувчининг айтишича, унга Россия армиясида хизмат қилиш таклиф қилинган. Айрим ҳужжатларга имзо қўйса, ҳибсхонадан чиқарилиши билдирилган.
“Бир аёл ҳужжатларга имзо қўйсам, мени озод қилишларини айтди. 10 кундан сўнг ҳарбий хизмат шартномасини имзолаганимни ва Украинага қарши жангларга боришимни айтишди. Қаршилик кўрсатмоқчи бўлганимда эса ортиқча ҳаракат қилмаслигимни уқтиришди”, дейди Ш.Ғ. суддаги кўрсатмасида.
Орадан 10 кун ўтгач, эркак Владимир шаҳридаги Россия Мудофаа вазирлигига қарашли чақирувга қадар тайёргарлик бўлимига борган. Кейин уни яна беш киши билан Қримдаги ҳарбий полигонга олиб боришган.
“Тасодифан минани босиб олдим”
Шундан кейин Қримдаги ҳарбий полигонга етказилган эркак 10 кунлик тайёргарликдан ўтган. Россия Мудофаа вазирлиги унинг картасига 2 миллион рубл ўтказган (шундан 1,6 миллион рублини турмуш ўртоғига юборган). Қолган 400 минг рублини эса шахсий эҳтиёжлари учун олиб қолган. Унга қурол-яроғ ва махсус анжомлар берилиб, жанг майдонига яқин ҳудуддаги аскарларга озиқ-овқат ва сув етказиб бериш вазифаси юклатилган.
2025-йил 24-июн куни соат 05:30 лар атрофида Ш.Ғ. Россия ҳарбийларига озиқ-овқат олиб кетаётган пайтда минани босиб олган. Портлаш натижасида унинг чап оёғи оғир жароҳатланган.
“Тасодифан минани босиб олдим, оқибатда чап оёғимдан қаттиқ жароҳатландим. Ўзимга биринчи ёрдам кўрсатиб, қон кетишини тўхтатдим ва рация орқали ёрдам сўрадим. Тахминан, бир соат ичида икки нафар аскар келиб, мени олиб кетди”, деди Ш.Ғ. судда.
Луганск ва Ростов госпиталларида даволанган эркакнинг чап оёғи тиззадан пастки қисмидан кесиб ташланган. Кейин Волгоградда даволанишни давом эттирган, унга ИИ гуруҳ ногиронлиги берилган ва протез ўрнатилган. Шунингдек, жароҳати учун 3 миллион рубл компенсация олган. У бу маблағни даволаниш ва бошқа шахсий эҳтиёжларига сарфлаган.
2025-йил 11-август куни Ш.Ғ. ҳарбий хизматдан озод қилинган. Шундан сўнг у Россиянинг Вязники шаҳрида қолган ва Ўзбекистонга қайтишга уринган. Бироқ Домодедово аеропортидан учиб кетишига рухсат берилмаган. Кейин Қозоғистон орқали автобусда қайтишга ҳаракат қилган, аммо у ердан ҳам Россияга қайтарилган. У 2026-йил 23-июн куни Внуково—Наманган йўналишидаги рейс билан Ўзбекистонга қайтган.
Жиноят ишлари бўйича Чуст тумани суди ҳукмига кўра, Ш.Ғ. Жиноят кодексининг 154-моддаси 1-қисми (ёлланиш) билан айбли деб топилган. Унга 4 йил муддатга озодликни чеклаш жазоси тайинланган.