Танзания президенти Самия Сулуҳу Ҳасаннинг турмуш ўртоғи вафот этди

Танзания президенти Самия Сулуҳу Ҳасаннинг турмуш ўртоғи вафот этди

Танзания президенти Самия Сулуҳу Ҳасаннинг турмуш ўртоғи Ҳафид Амеир Ҳасан Занзибардаги шифохонада даволанаётган вақтида вафот этди. Президентнинг турмуш ўртоғи (юқоридаги суратда), Ҳафид Амеир Ҳасан, омма эътиборида бўлишни хушламаслиги билан танилган ва камдан-кам ҳолларда суратга тушган.

Амеирнинг ўлимини расман эълон қилган вице-президент Деогратиус Ндежемби унинг юрак хасталигидан азият чекканини айтди.

Ндежемби, шунингдек, мамлакатнинг ярим мухтор ороли бўлмиш Занзибардаги Кизимкази қишлоғида дафн маросимига тайёргарлик кўрилаётганини маълум қилди.

Амеир қишлоқ хўжалиги соҳасидаги олим бўлиб, асосан жамоатчилик эътиборидан четда қолган. У 2021 йилда президент Ҳасан лавозимга киришганидан сўнг Танзаниянинг биринчи «Биринчи жаноби» (First Gentleman) бўлди.

Ндежемби ўз баёнотида Амеир душанба куни маҳаллий вақт билан соат 08:00 да (Гринвич бўйича 06:00) Эмилио Мзена номидаги ёдгорлик шифохонасида вафот этганини айтди.

Вице-президент таъзия изҳорларига бошчилик қилиб, президент Ҳасанга, Амеирнинг оиласи ва дўстларига ҳамдардлик билдирди.

Кения президенти Уильям Руто ушбу ўлим ҳақидаги хабарни «чуқур қайғу» билан қабул қилганини айтди.

«Президент Самия умрбод ҳамроҳидан, фарзандлари севимли отасидан, Танзания эса ардоқли фарзандидан айрилди», деб ёзди у ижтимоий тармоқда.

«Биринчи жаноб» президент билан бирга жамоатчилик олдида камдан-кам кўриниш берар ва фақат баъзида расмий тадбирларда у билан бирга қатнашар эди.

У Ҳасан билан 1978 йилда, у миллий сиёсатга кириб келишидан олдин турмуш қурган. Уларнинг тўрт нафар фарзанди — уч ўғил ва бир қизи бор.

Уларнинг қизи Вану Ҳафид Амеир ҳам сиёсатчи бўлиб, ҳозирда Занзибар Вакиллар палатасида Миллий ассамблея аъзоси сифатида фаолият юритади.