Тамбовдаги Вилдберриес омбори дронлар ҳужумига учради
26-августга ўтар кечаси Украина учувчисиз учиш аппаратлари Россиянинг Тамбов вилоятига ҳужум қилди. Ҳужум оқибатида Котовск шаҳрида жойлашган Вилдберриес маркетплейсининг йирик логистика марказида кучли ёнғин келиб чиқди. Ёнғин 40 минг квадрат метр майдонни қамраб олган, бир нафар омбор ходими жароҳатланган. Шу кеча Нижний Новгород вилоятининг Кстово шаҳридаги нефтни қайта ишлаш заводи яқинида ҳам ёнғин кузатилган.
Тамбов вилоятидаги Вилдберриес омбори дрон ҳужумига учради. Вилоят губернатори Евгений Первйшовнинг тасдиқлашича, Вилдберриес логистика марказига дрон келиб тушган. Ҳаво ҳужумидан мудофаа тизими ва "БАРС-Тамбов" мобил ўт очиш гуруҳлари томонидан жами 16 та учувчисиз учиш аппарати йўқ қилинган.
Шунга қарамай, дронлардан бири логистика марказига зарба бериб, катта ёнғинга сабаб бўлган. Вилоят раҳбари таъкидлашича, "Украина дронлари зарбалари натижасида Вилдберриес логистика марказида ёнғин содир бўлди. Ёнғин майдони 40 минг квадрат метрни ташкил этди".
Ҳужум оқибатида омборнинг бир ходими жароҳатланган. Шунингдек, вилоят ҳудудида дрон қулаши натижасида хусусий уйлардан бирида ҳам ёнғин чиққан.
Ижтимоий тармоқларда Котовскдаги логистика марказида содир бўлган йирик ёнғин акс этган видеолар тарқалди. Кадрларда обьект ҳудудидан катта миқдорда тутун кўтарилаётгани ва ёнғин кенг майдонни қамраб олгани кўринади. Очиқ манбалардаги маълумотларга кўра, Вилдберриесънинг Котовскдаги логистика мажмуаси умумий ҳисобда 108 минг квадрат метр майдонни эгаллайди.
Мазкур обьект аввал ҳам дронлар ҳужумига учраган. Хусусан, 18-июлга ўтар кечаси омбор мажмуасига учувчисиз учиш аппарати зарба бериши натижасида йирик ёнғин содир бўлган. Ўша ҳодисада етти киши ҳалок бўлган ва яна 25 киши жабрлангани хабар қилинган.
Айни пайтда Нижний Новгород вилоятининг Кстово шаҳри аҳолиси маҳаллий нефтни қайта ишлаш заводи жойлашган ҳудудда кучли ёнғин кузатилгани ҳақида ижтимоий тармоқларда хабар берган. Гап "Лукойл-Нижегороднефтеоргсинтез" нефтни қайта ишлаш заводи ҳақида кетмоқда. Тарқалган кадрларда корхона жойлашган ҳудуд яқинида кучли ёнғин ва осмонга кўтарилаётган тутунни кўриш мумкин.
26-августга ўтар кечаси Нижний Новгород вилоятида ҳаво ҳужуми хавфи режими амал қилган. Бироқ маҳаллий ҳокимият дастлаб дронлар ҳужумининг эҳтимолий оқибатлари ҳақида батафсил маълумот бермаган. Кстоводаги завод Россия ҳудудидаги нефтни қайта ишлаш обьектларига Украина дронлари зарбалари кучайганидан буён бир неча бор ҳужумга учраган.