Таиландга визани Тошкентдан чиқмасдан олиш мумкин бўлади — консуллик шарҳи

Таиланд визасини Тошкентдан чиқмасдан олиш мумкин бўлади — консуллик шарҳи

Таиланд 15 сентябрдан бошлаб Ўзбекистон фуқаролари учун 60 кунлик визасиз киришни бекор қилади.

Бу виза аризаларини айнан Россиядаги элчихона кўриб чиқиши билан боғлиқ бўлиб, унинг юрисдикциясига Ўзбекистон ҳам киради.

У ердан хабар беришларича, туристлар учун йиғимни тўлашнинг бир нечта усуллари кўзда тутилган ва Москвага бориш шарт эмас.

Хусусан, Россиядаги элчихонага шахсан мурожаат қилишдан ташқари, виза йиғими ва қўшимча хизматлар учун Ўзбекистонда Lilavadi Consult курьерлик-консалтинг компанияси орқали тўлов қилиш мумкин. Бундан ташқари, буни Москвадаги танишлар орқали ҳам амалга ошириш мумкин, улар йиғимни АҚШ долларида нақд пул шаклида кирита оладилар.

Вақт ўтиши билан ушбу хизмат тўлиқ онлайн тарзда тақдим этилиши кутилмоқда.

Эслатиб ўтамиз, Ўзбекистон Ташқи ишлар вазирлиги «Газета»га мамлакат фуқаролари учун қулайроқ шароитлар яратиш бўйича Таиланд томони билан музокаралар олиб борилаётганини маълум қилган эди.

Ҳозирча Ўзбекистон фуқаролари учун сайтда виза талаб этилмаслиги кўрсатилган.

Анкета ариза берувчининг ўзи ёки унинг вакили (масалан, туристик фирма) томонидан тўлдирилади. Саёҳат мақсади ва йўналиши, алоқа маълумотлари, шунингдек, жорий бандлик тўғрисидаги маълумотларни кўрсатиш зарур. Аризага бир қатор ҳужжатлар саҳифаларининг нусхалари илова қилинади, жумладан, паспорт, хорижга чиқиш паспорти (камида иккита бўш саҳифаси бўлиши керак), икки томонга авиачипталар (ёки авиакасса муҳри ва ходимнинг асл имзоси қўйилган банд қилиш ҳужжати) ва Таиландда яшаш жойи тасдиғи. Шунингдек, олти ойдан кўп бўлмаган вақт олдин туширилган 4×6 см ўлчамдаги фотосурат талаб қилинади.

Молиявий маблағлар мавжудлигини тасдиқлаш ҳам зарур. Охирги уч ой давомида пул тушумлари ва харажатлари ҳамда ариза тўлдирилган кундаги ҳисобварақ қолдиғи тўғрисида инглиз тилидаги банк кўчирмасининг асли (ёки нотариал тасдиқланган таржимаси бўлган кўчирма) керак бўлади. Картада бир киши учун камида 20 минг Таиланд бати (700 доллардан камроқ) бўлиши керак. Кредит карталари бўйича кўчирмалар қабул қилинмайди.

Вояга етмаганлар учун ариза берувчининг (ота-онанинг) ҳисобварағидан камида 40 минг бат (тахминан 1400 доллар; болалар сони кўпроқ бўлса, ҳар бир бола учун камида 20 минг бат тўғри келиши керак) қолдиқ бўлган кўчирма тақдим этилишига йўл қўйилади.

Анкета топширилгандан сўнг, тизим QR-код ва консуллик йиғимини тўлаш учун реквизитлар бўлган тасдиқловчи ҳужжатни (confirmation) шакллантиради — уни чоп этиш керак.

Йиғилган ҳужжатлар билан йиғимни тўлашда воситачилик қиладиган компанияга мурожаат қилиш лозим. Визаларни расмийлаштириш бўйича сайт ҳозирги вақтда Ўзбекистон банкларининг карталарини қабул қилмаяпти.

Компанияда шартнома ва ишончномани имзолаш талаб этилади, шундан сўнг тўлов амалга оширилади (буни QR-код орқали қилиш мумкин). Кутилишича, бутун жараён 5−10 дақиқадан кўп вақт олмайди.

Таиланд фахрий консуллиги маълумотларига кўра, виза йиғими миқдори 40 долларни (тахминан 480 минг сўм) ташкил этади.

Туристик виза онлайн форматда берилади ва паспортга урилмайди. Бу визани расмийлаштириш учун паспортни Москвадаги элчихонага юбориш шарт эмаслигини англатади.

Инглиз тилида бўлмаган барча ҳужжатлар инглиз тилига нотариал тасдиқланган таржимаси билан бирга тақдим этилиши керак.

Элчихонанинг консуллик ходимлари қўшимча ҳужжатларни сўраб олиш ёки ариза берувчини суҳбатга таклиф қилиш ҳуқуқини ўзида сақлаб қолади.

Электрон почта орқали олинган визани Таиландга киришда чегара назорати ходимига тақдим этиш учун чоп этиш керак.

Виза уч ойга берилади. Бироқ бўлиш муддатини чегара назорати ходими виза турига мувофиқ белгилайди.

Барча зарур маълумотларни олиш ва саволлар бериш мумкин бўлган Telegram-бот яратилиши кутилмоқда.

Виза олиш умумий ҳисобда қанча вақт олишини «Газета» аниқлай олмади.