Таиландда мусобоқага тайёрланаётган 18 ёшли голфчи қиз вафот этди

Таиландда мусобақага ҳозирлик кўраётган 18 ёшли австралиялик голфчи Жессика Банг миясига қон қуйилиши оқибатида вафот этди. Бу ҳақда Австралия аёллар профессионал голф ассоциацияси (ВПГА Тоур оф Аустраласиа) матбуот хизмати хабар берди.

Маълум қилинишича, Банг 1-август куни Таиланд пойтахти Бангкокда мусобақага тайёргарлик кўраётган пайтда тўсатдан ҳушини йўқотган. У зудлик билан шифохонага етказилиб, мия жарроҳлиги амалиётини ўтказган. Бироқ шифокорларнинг барча уринишларига қарамай, голфчи тузалиб кета олмаган ва 13-август куни ҳаётдан кўз юмган.

Австралия аёллар профессионал голф ассоциацияси Бангни "ғайриоддий ёш истеъдод" деб таърифлаб, унинг вафоти Австралия голф ҳамжамияти учун катта йўқотиш эканлигини таъкидлади. Ташкилот марҳум спортчининг оиласи, дўстлари ва яқинларига чуқур ҳамдардлик билдирди.

Қайд этилишича, Жессика Банг Бангкокда Жанубий Корея аёллар профессионал голф турининг халқаро саралаш турнирида иштирок этишга тайёргарлик кўраётган эди. У 2025-йил охирида профессионал голфчи мақомига эга бўлганидан сўнг қисқа вақт ичида Австралия голфидаги энг истиқболли ёш спортчилардан бирига айланган эди.

У 2026-йил бошида профессионал фаолиятидаги бешинчи турнирида илк ғалабасини қўлга киритган. У Австралиянинг Янги Жанубий Уелс штатида ўтказиладиган аёллар ўртасидаги профессионал голф турнирининг минтақавий саралаш босқичида ғолиб бўлган.