Тадбиркорларга солиқ қарзларини пенясиз ёпиш имкони берилди
Ўзбекистонда кичик ва ўрта тадбиркорлик субьектлари учун «Иккинчи имкон» иқтисодий амнистияси эълон қилинди. Унга кўра, тадбиркорлар аввал юзага келган солиқ қарзини 2026-йил охиригача тўлиқ тўласа, ушбу қарз бўйича ҳисобланган пенялар ҳисобдан чиқарилади.
Тадбиркорларга солиқ қарзларини пенясиз ёпиш имконияти берилди. Бу ҳақда Президентнинг 27-августдаги ПФ–175-сонли фармонида белгиланган бўлиб, ҳужжат 28-августдан кучга кирди.
Фармонга кўра, "Иккинчи имкон" иқтисодий амнистияси 2026-йил 31-декабргача амал қилади ва кичик ҳамда ўрта тадбиркорлик субьектларини қамраб олади.
Унга биноан, иқтисодий амнистия эълон қилингунга қадар юзага келган солиқ қарзи, пеняни ҳисобга олмаган ҳолда, 2026-йил 31-декабргача тўлиқ тўланса, ушбу қарздорлик бўйича ҳисобланган пеня ҳисобдан чиқарилади. Шунингдек, қарз билан боғлиқ ижро ишлари тугатилади.
Мазкур тартибдан фойдаланиш учун тадбиркорлик субьектида 2027-йил 1-январ ҳолатига пенядан ташқари солиқ қарзи қолмаган бўлиши шарт.
Бундан ташқари, тадбиркор аввал тақдим этган солиқ ҳисоботларига мустақил равишда тузатиш киритиб, қўшимча ҳисобланган солиқ суммасини 2026-йил охиригача тўлиқ тўласа, ушбу суммага нисбатан пеня ҳисобланмайди.
Иқтисодий амнистия доирасида хатоларини мустақил бартараф этган тадбиркорларнинг Тадбиркорлик субьектларининг барқарорлик рейтингидаги баллари ҳам пасайтирилмайди.
Шунингдек, 2026-йил 1-январга қадар шаклланган айрим қарздорликлар ҳисобдан чиқарилади. Улар орасида солиқ ҳисоботини ўз вақтида тақдим этмаганлик учун қўлланган маъмурий жарималарнинг тўланмаган қисми ҳам мавжуд.