Сув хўжалиги вазирлиги Амударёнинг қуриб бораётгани ҳақидаги хабарларга муносабат билдирди
Сув хўжалиги вазирлиги Амударёнинг қуриётгани ҳақидаги хабарлар фонида унда сув оқими сақланиб қолаётганини маълум қилди. Вазирлик кузги сув сатҳи ва сарфининг пасайишини мавсумий жараёнлар билан изоҳлади. Вегетация мавсуми якунлангач, омборларда кейинги мавсум учун захиралар тўпланиши қайд этилди.
Сув хўжалиги вазирлиги Амударёнинг қуриб бораётгани ҳақидаги хабарларга изоҳ берди
Ўзбекистон Сув хўжалиги вазирлиги 10-октабр куни ижтимоий тармоқларда Амударёнинг қуриб бораётгани ҳақида тарқалаётган хабарлар юзасидан муносабат билдирди.
Амударё Тожикистон ва Афғонистон тоғларидан бошланувчи Пянж ва Вахш дарёларининг қўшилишидан вужудга келади. Кофарниҳон дарёси унинг йирик тармоқларидан бири саналади.
Вазирлик берган маълумотга кўра, 9-октабр куни Амударёнинг Ўзбекистон ҳудудига кириш қисмида жойлашган Термиз гидропостида сув сатҳи 239 см ни ташкил этган. Бу 2025-йилнинг шу давридаги кўрсаткичдан 27 см га юқори.
Шунингдек, Керки гидропостида сув сарфи сониясига 499 кубометрни ташкил этди, бу ўтган йилнинг мос даврига нисбатан сониясига 63 кубометрга кам.
“Мазкур гидрологик кўрсаткичлар Амударёда сув оқими сақланиб қолаётганини кўрсатади”, — дейилади хабарда.
Вазирлик, шунингдек, Амударё ҳавзасининг юқори қисмида, Тожикистондаги Вахш дарёсида жойлашган Норак сув омбори бўйича ҳам маълумот келтирди. 9-октабр ҳолатига кўра, сув омборига сув кириши сониясига 408 кубометрни, сув чиқарилиши эса сониясига 320 кубометрни ташкил этди. Ундаги сув ҳажми 10,54 млрд кубометрга етган.
“Сентабр-октабр ойларида дарёларда сув сарфи ва сатҳининг пасайиши мавсумий гидрологик жараён ҳисобланади. Вегетация мавсуми якунланиши муносабати билан сув омборларида кейинги мавсум эҳтиёжлари учун сув захиралари тўпланади”, — дея қайд этди Сув хўжалиги вазирлиги.
Туркманистоннинг Аваза миллий туристик зонасида октабр бошида бўлиб ўтган Марказий Осиё давлатлараро сув хўжалигини мувофиқлаштирувчи комиссиясининг 95-йиғилишида Амударё ва Сирдарё ҳавзаларида 2026-йилги вегетация даври якунлари сарҳисоб қилинди. Иштирокчилар 2026−2027-йилларнинг вегетациялараро даври учун сув олиш лимитлари ва сув омборларининг прогноз иш режимларини тасдиқлади. Навбатдаги йиғилишни 2027-йилнинг биринчи чорагида Ўзбекистонда ўтказиш режалаштирилган.
Июн ойида Самарқандда Қуйи Амударё ҳавзасида Сув ресурсларини интеграциялашган бошқариш (СРИҲБ) режаси консепсияси имзоланди. Ушбу консепсия сув ресурсларидан фойдаланишни барча сув истеъмолчиларининг манфаатлари, экотизимлар ҳолати ва узоқ муддатли иқлим хавф-хатарларини ҳисобга олган ҳолда бутун дарё ҳавзаси миқёсида режалаштиришни назарда тутади.