«Сув тақчиллиги Марказий Осиё ривожланиши учун жиддий чекловга айланмоқда» — Шавкат Мирзиёев
Ўзбекистон Президенти Марказий Осиё мамлакатларини сув ва иқлим ўзгариши масалаларини биргаликда ҳал қилишга чақирди. «Сув ресурслари тақчиллиги Марказий Осиё ривожланиши учун жиддий чекловга айланмоқда. Сувнинг катта миқдорда йўқотилиши минтақага жуда қимматга тушмоқда», — деди Шавкат Мирзиёев.
«Сув тақчиллиги Марказий Осиё ривожланиши учун жиддий чекловга айланмоқда» — Шавкат Мирзиёев
Сув ресурслари ва иқлим ўзгариши масалалари Марказий Осиё мамлакатларининг биргаликдаги ечимларини талаб этади. Бу ҳақда Ўзбекистон президенти Шавкат Мирзиёев 8 октябрь куни Туркманистоннинг «Аваза» миллий сайёҳлик зонасида бўлиб ўтган Марказий Осиё давлатлари ва Озарбайжон раҳбарларининг саккизинчи Маслаҳат учрашувида маълум қилди.
«Сув ресурслари тақчиллиги Марказий Осиё ривожланиши учун тобора жиддий чекловга айланмоқда. Иқлим ўзгармоқда, аҳоли сони ортмоқда, қишлоқ хўжалиги ва инфратузилмага тушаётган юклама кўпаймоқда. Шу боис бизда қанча сув борлиги ва ундан қандай фойдаланилаётганини аниқроқ тушунишимиз зарур», — деди Шавкат Мирзиёев.
Президент замонавий рақамли мониторинг тизимларини жорий этиш, ирригация тармоқларини модернизация қилиш ва сув тежовчи технологияларни кенг қўллаш муҳимлигини таъкидлади.
«Бугунги кунда сувнинг катта йўқотишлари минтақамизга жуда қимматга тушмоқда», — деб қайд этди давлат раҳбари.
У Марказий Осиёда сувдан оқилона фойдаланиш бўйича Амалий ҳаракатлар ўн йиллиги тўғрисидаги умумий ташаббусни тўлиқ амалга оширишга чақирди.
Келгуси йилда Ўзбекистон Оролни қутқариш халқаро жамғармасига раисликни қабул қилади. «Биз ушбу миссияни катта масъулият деб биламиз. Раислик даврида жамғарма фаолиятини янада самарали қилиш, янги экологик лойиҳаларни ишга тушириш ва қўшимча молиялаштиришни жалб этишни ният қилганмиз», — деди президент.
Шавкат Мирзиёевнинг сўзларига кўра, сув ресурсларидан фойдаланиш масалалари бўйича Афғонистон билан мулоқотга алоҳида эътибор қаратиш зарур. «Бу мулоқот минтақадаги барча мамлакатлар манфаатларини албатта ҳисобга олган ҳолда, доимий ва аниқ мазмунга эга бўлиши керак», — деди у.
Президент, шунингдек, ҳавонинг ифлосланиши Марказий Осиё шаҳарларининг энг сезиларли муаммоларидан бирига айланаётганини таъкидлади.
У Ўзбекистон «Марказий Осиё тоза ҳавоси» халқаро консорциумини ташкил этишни таклиф қилганини эслатиб ўтди.
«Унинг фаолиятини аниқ қўшма лойиҳадан: мамлакатларимиз саноат зоналари, агрокластерлари ва транспорт узелларини экологик модернизация қилиш бўйича пилот Дастуридан бошлаш мумкин. Бу муаммо муҳокамасидан атроф-муҳитга юклама айниқса юқори бўлган жойларда амалий ишга ўтиш имконини беради», — дея қўшимча қилди давлат раҳбари.