Сув олиш қоидаси такроран бузилса, молиявий санксия беш баравар ошади
Ўзбекистонда сув олиш тартибини бузган юридик шахсларга молиявий санксия қўллаш тартиби тасдиқланди. 2027-йилдан белгиланган шартларга мос биринчи қоидабузарлик учун огоҳлантириш берилади. Санксия қўлланганидан кейин бир йил ичида қоида такроран бузилса, унинг миқдори беш баравар оширилади.
Сув олиш қоидаси қайта бузилса, молиявий санксия беш баравар кўпаяди
Ҳукуматнинг 2026-йил 21-октабрдаги 585-сон қарори билан тегишли низом тасдиқланди. У қишлоқ хўжалиги, балиқчилик, саноат, энергетика ва хўжалик-маиший эҳтиёжлар учун сув олишдаги қоидабузарликларга тааллуқли.
Қуйидаги ҳолатлар сув олиш тартибини бузиш деб баҳоланади: белгиланган лимитдан ортиқча сув олиш; сув олиш шартномасини расмийлаштирмасдан сув олиш; сув олиш жойларини сувни бошқариш ва ҳисобга олиш воситалари билан жиҳозламаслик; сувдан махсус фойдаланиш рухсатномасисиз сув олиш; ўзбошимчалик билан сув олиш.
2027-йил 1-январдан «Биринчи хато учун - огоҳлантириш» қоидаси жорий этилади. У йил давомида биринчи марта сув олиш тартибини бузган, бироқ фуқаролар ҳаёти ва соғлиғига ҳамда ўзгаларнинг мулкига зарар етказмаган юридик шахсларга нисбатан қўлланади.
Бундай вазиятда Инспексия юридик шахсни suvnazorat.uz электрон платформаси орқали огоҳлантиради ва қоидабузарликни бартараф этиш бўйича кўрсатма беради. Ҳолат 10 кун ичида бартараф этилмаса, молиявий санксия қўлланади.
Санксия миқдори ҳар минг куб метр сув учун базавий ҳисоблаш миқдорига нисбатан Сув кодексининг 164-моддасида белгиланган фоизлар асосида ҳисобланади. Санксия қўлланганидан кейин бир йил ичида тартиб такроран бузилса, беш баравар миқдорда санксия қўлланади.
Тўловни ихтиёрий амалга ошириш учун енгилликлар ҳам белгиланган. Қарор ва санксия ҳисоб-китоби олинган кундан бошлаб бир ой ичида сумманинг 50 фоизи тўланса, юридик шахс қолган қисмини тўлашдан озод этилади.
Шунингдек, санксияни олти ойдан кечиктирмасдан бўлиб-бўлиб тўлаш мумкин. Бунда ҳар ойлик тўлов умумий сумманинг олтидан бир қисмидан кам бўлмаслиги керак. Дастлабки тўлов бир ой ичида амалга оширилса, бўлиб тўлаш тартиби автоматик равишда қўлланади.
Низомга кўра, санксия ихтиёрий тўланганида ҳуқуқий таъсир чораси қўлланмаган деб ҳисобланади. Бир ой ичида ихтиёрий тўлов амалга оширилмаса, Инспексия судга даъво аризаси киритади.