Сурхондарёда ўрмонда ёнғин чиқди
Бойсун туманидаги Хомкон ўрмон бўлимида ёнғин содир бўлди. Уни бартараф этишда 300 нафардан ортиқ киши қатнашган. Жумладан, маҳаллий аҳолидан ҳам кўнгиллилар жалб қилинган.
Сурхондарё вилоятининг Бойсун туманида жойлашган ўрмон ҳудудида ёнғин содир бўлди. Бу ҳақда вилоят Фавқулодда вазиятлар бошқармаси (ФВБ) ахборот хизмати расмий маълумот берди.
Хабарга кўра, 12-август куни соат 17:15 да “112” рақамига Бойсун давлат ўрмон хўжалигининг Хомкон ўрмон бўлими ҳудудида қуруқ ўт ва шох-шаббалар ёнаётгани ҳақида хабар келиб тушган.
Воқеа жойига Сурхондарё вилояти ФВБ ва Бойсун давлат ўрмон хўжалигининг ходимлари ҳамда техникалари етиб борган. Ёнғинни ўчириш ишларига ФВБдан 194 нафар ходим ва 8 та техника, Бойсун давлат ўрмон хўжалигидан 60 нафар ходим ва 3 та техника, шунингдек, маҳаллий аҳолидан 55 нафар кўнгилли фуқаро жалб этилган.
15-август куни соат 9:00 га қадар ёнғин бутунлай бартараф этилган. Ҳодиса натижасида тахминан 1 гектар майдондаги қуруқ ўт ва шох-шаббалар ёниб кетган. Жабрланганлар ҳақида маълумот келиб тушмаган.
Айни пайтда ёнғиннинг келиб чиқиш сабаблари ўрганилмоқда.