Сурхондарёда жарроҳлар эътиборсизлиги туфайли ҳомиладор аёл вафот этди

Сурхондарёда жарроҳларнинг лоқайдлиги оқибатида ҳомиладор аёл ҳаётдан кўз юмди

Сурхондарёда ҳомиладор аёлнинг вафоти билан боғлиқ жиноят иши юзасидан икки нафар жарроҳга ҳукм чиқарилди.

Маълум бўлишича, 2025-йил 13-июл куни кечқурун ҳомиладор С.T.da қорин соҳасида оғриқ, кўнгил айниши ва қайт қилиш каби белгилар пайдо бўлган. Эртаси куни соат 05:00 лар атрофида у онаси ва опалари билан туман тиббиёт бирлашмасига келиб, навбатчи жарроҳ Ч.Х. кўригидан ўтган.

С.T.ning қорин қисмида 2019-йилда ўтказилган жарроҳлик амалиётидан қолган чандиқ мавжуд бўлган. Суд ҳужжатларида қайд этилишича, бемор ичак тутилишини аниқлаш учун зарур лаборатор ва инструментал текширувлардан ўтказилмаган ҳамда унга аниқ ташхис қўйилмаган.

Жарроҳ Ч.Х. судда С.T.ning эски операция чандиғини кўрганини, бемор 2019-йилда турмуш ўртоғи уриши оқибатида қорин соҳасидан операция қилинганини айтганини билдирган. Бироқ у кўрик чоғида ўткир жарроҳлик касаллиги аломатларини аниқламаган. Унинг сўзларига кўра, беморнинг бир неча соат аввал ичи келиб, ел чиқаргани сабаб ичак тутилиши эҳтимолини истисно қилган. Ч.Х. аёлга ошқозон фаолиятининг ўткир функсионал бузилиши ташхисини қўйиб, муолажа белгилаган. Кейинги кўрикда оғриқ ва қайт қилиш тўхтагач, безовталик қайталанса шифохонага мурожаат қилишни тавсия этиб, уни уйига жўнатган.

15-июл куни С.Т. бошқа навбатчи жарроҳ — X.Sh. кўригидан ўтган. Иш ҳужжатларига кўра, бу сафар ҳам қайта лаборатор ва инструментал текширувлар тайинланмаган.

X.Sh. ҳам беморнинг қорнидаги эски операция чандиғини кўрган. У С.T.ga сурункали панкреатит ташхисини қўйиб, муолажа ва клизма буюрган. Клизмадан сўнг аёлнинг ичи келиб, ел чиққани ва оғриқ камайгани сабаб уни туғуруқ бўлимига юборган.

X.Sh. судда С.T.ning қўлида икки кун аввалги УЗИ хулосаси бўлгани учун такрорий текширув тайинламаганини айтган. Шунингдек, 31 ҳафталик ҳомиладорликни инобатга олиб, рентген текширувининг ҳомилага таъсирини ҳисобга олганини билдирган. Жарроҳ аёлни вилоят шифохонасига олиб боришни тавсия қилган, бироқ унинг онаси кун кеч бўлгани сабаб эртаси куни боришини айтган. 16-июл куни С.T.ning аҳволи оғирлашган. Текширувлардан сўнг унда ичак тутилиши аниқланиб, Денов туманидаги тиббиёт муассасасига олиб борилган ва операция қилинган.

Жарроҳлик жараёнида ингичка ичакнинг бир қисми некрозга учрагани ва тешилгани, ичак массалари эса қорин бўшлиғига тарқалгани аниқланган. Некрозга учраган ичакнинг қарийб 50 сантиметр қисми олиб ташланган. Операциядан кейин аёл ўзига келган, бу пайтда унинг ҳомиласи ҳам тирик бўлган.

Шунга қарамай, кўрсатилган тиббий ёрдамга қарамасдан, С.Т. ичак тутилиши оқибатида юзага келган оғир асоратлар сабаб 17-июл куни вафот этган.

Экспертиза хулосасига кўра, аёл ичак тутилиши оқибатида юзага келган ичак некрози, перитонит, сепсис ва кўп аъзолар етишмовчилигидан вафот этган. Комиссия касаллик дастлабки мурожаат кунидаёқ аниқланиб, ўз вақтида операция қилинганида аёл ва унинг ҳомиласини сақлаб қолиш имконияти юқори бўлганини билдирган.

Жиноят ишлари бўйича Қизириқ туман суди Ч.Х. ва X.Sh.ни Жиноят кодексининг 116-моддаси 3-қисмида назарда тутилган, яъни касб юзасидан ўз вазифаларини лозим даражада бажармаслик оқибатида одам ўлимига сабаб бўлиш жиноятини содир этганликда айбдор деб топди. Уларнинг ҳар бирига 3 йил муддатга озодликни чеклаш жазоси тайинланди.

Шунингдек, икки жарроҳ 1 йил 6 ой давомида Соғлиқни сақлаш вазирлиги тизимидаги тиббиёт муассасаларида жарроҳ лавозимида ишлаш ҳуқуқидан маҳрум қилинди.