Суриядаги жангларда қатнашган наманганлик эркак 15 йил-у 2 ойга қамалди
Суриядаги жангларда қатнашган наманганлик эркак 15 йил-у 2 ойга қамалди
Суриядаги қуролли тўқнашувларда қатнашиб, кейинчалик Туркиядан одамларни ушбу давлат чегарасигача олиб борган наманганлик эркак озодликдан маҳрум этилди.
Маълум бўлишича, 1982-йилда туғилган Х.У. 2004-йилда ишлаш мақсадида Россияга йўл олган. У аввал қурилишда, кейин эса Москвадаги умумий овқатланиш шохобчасида меҳнат қилган.
Россияда яшаган пайтида Х.У. яширин диний йиғинларда қатнаша бошлаган. Сўнгра қуролли гуруҳ сафига қўшилиш ниятида 2010-йилда Россияни тарк этиб, Озарбайжон ва Эрон орқали Афғонистонга борган. У ердан жанговар тайёргарликдан ўтиш учун Покистонга юборилган.
2012-йилда Х.У. Покистон, Афғонистон, Эрон ва Туркия орқали Сурияга етиб борган. У судда гуруҳ аъзоларини озиқ-овқат ва кийим-кечак билан таъминлагани, уларни бозор ва шифохоналарга олиб борганини айтган. 2014-йил бошларида эса қуролли тўқнашувлардан бирида қатнашиб, жароҳат олган. Жароҳатидан тузалгач, Х.У. савдо-сотиқ ишлари билан шуғуллана бошлаган. У судда 2015-йилда нефт савдосидан ҳам даромад олганини билдирган.
“100 баррел нефтни 6 минг АҚШ долларига сотиб олиб, 12 минг АҚШ долларига сотдим. Шундан 4 минг АҚШ долларини жамоатга бердим”, деган Х.У. суддаги кўрсатмасида.
2021-йил сентябрида Х.У. оиласи билан Суриядан Туркияга ўтган. Чегарада ушланган эркак 6 ой 14 кун қамоқда сақланган. Озодликка чиққач, Истанбулда яшаб, йўловчи ташиш билан шуғулланган.
Х.U.ning судда айтишича, шу даврда ўзини разведка ходими деб таништирган шахс ундан террорчилик фаолиятига алоқадор одамлар ҳақида маълумот етказиб туришни сўраган. Бунинг эвазига унга ва оиласига енгиллик яратилиши ваъда қилинган. Кейинчалик Х.У. Сурияга кетаётган одамларни Истанбулдан чегара яқинидаги Рейҳанли шаҳригача олиб бора бошлаган. У йўловчиларнинг ҳужжатларини суратга олиб, маълумотларни ўша шахсга юбориб турган.
Х.У. ҳар бир ёки икки ҳафтада тўрт нафардан одамни Рейҳанлигача олиб борганини, шу тариқа жами 50–60 кишини ташиганини билдирган. Улар орасида Ўзбекистон фуқаролари ҳам бўлган. Суд ҳужжатларида айримлари кейинчалик Сурия ҳудудидаги террорчилик ташкилотларига қўшилгани қайд этилган.
“Мен уларни террорчилик ташкилотларига қўшилиш учун олиб бормаганман. Фақат Истанбулдан Рейҳанлигача олиб бориб, йўл ҳақини олганман”, деган Х.У. судда.
Бироқ унинг Телеграм ва ВҳацАпп ёзишмаларида Сурияга кетаётган шахсларнинг ҳужжатлари, уларни олиб бориш ва тўловларга оид маълумотлар аниқланган.
2025-йил 11-октябр куни эса Х.У. беш нафар Ўзбекистон фуқаросини Сурия ҳудудига ўтказиш учун олиб кетаётган вақтда Туркия ҳуқуқ-тартибот идоралари томонидан ушланган. 2026-йилда ўтказилган суд-тиббий экспертизасида Х.U.ning танасида камида 26 та ёт жисм аниқланган. Экспертлар улар портлаш оқибатида танага кирган металл парчалар бўлиши мумкинлигини истисно қилмаган.
Жиноят ишлари бўйича Поп туман суди Х.U.ni Жиноят кодексининг терроризм, ёллаш, террорчилик ташкилоти фаолиятида иштирок этиш ва бошқа жиноятлар билан боғлиқ тегишли моддалари бўйича айбдор деб топган. Жазоларни қисман қўшиш йўли билан унга узил-кесил 15 йил 2 ой муддатга озодликдан маҳрум қилиш жазоси тайинланган.