Сурия президенти АҚШнинг Ню Жерси штатини Исроилга беришни таклиф қилди
Сурия президенти АҚШнинг Ню Жерси штатини Исроилга беришни таклиф қилди
Сурия президенти Аҳмад аш-Шараъа АҚШ раҳбари Доналд Трамп билан босиб олинган Голан тепаликлари масаласини муҳокама қилаётганда Исроилга Ню Жерси штатини беришни таклиф қилганини айтди. Бу ҳақда Аш-Шараъа ўзи Ню Ёркда Атлантика кенгаши томонидан ташкил этилган тадбирда сўзлаган нутқида маълум қилди.
Сурия етакчиси нутқининг бошида Трампнинг 2025-йилда мамлакатга қарши санксияларни бекор қилганини эътироф этди.
“У (Трамп — таҳр.) билан муносабатларимиз мутлақо ўзига хос шаклланди. Лекин бир куни унинг олдига, Оқ уйга келганимда ҳазиллашдим. У Голан тепаликлари Исроил суверенитети остида экани ҳақида гапирганида, мен: нега Ню Жерсини исроилликларга бермайсиз? Голан тепаликлари сизга тегишли эмас, аммо Ню Жерси сизники дедим. Билишимча, у ерда Трампга овоз бермайдиган демократлар кўп. Шундай экан уни исроилликларга берса ёмон бўлмасди. Ҳеч бўлмаганда, бу унга тегишли ҳудуд, аммо Голан тепаликлари президент Трампники эмас”, деди Сурия президенти.
Таъкидланишича, Трамп суҳбат давомида Голан тепаликлари Сурияники эканини тан олган.
“Бундай ҳазилдан қатъи назар, Голан тепаликлари ўзининг халқига тегишли. Шунинг учун на Сурия президенти, на Америка президенти, на бошқа кимдир улардан воз кечишга ёки уларни бошқаларга беришга ҳақли”, дея хулоса қилди Аҳмад аш-Шараъа.
1944-йилдан бери Сурия таркибида бўлган Голан тепаликлари 1967-йилда Олти кунлик уруш давомида Исроил томонидан эгаллаб олинган. 1981-йилда Исроил бу ҳудудни бир томонлама аннексия қилган. БМТ Хавфсизлик кенгаши 1981-йил 17-декабрда қабул қилган 497-резолюция билан аннексияни ҳақиқий эмас деб топган.
2019-йилда Трамп президентлик лавозимидаги биринчи муддати давомида тегишли декларацияни имзолаб, Исроилнинг Голан тепаликлари устидан суверенитетини тан олган. Вашингтоннинг ушбу бир томонлама қарорига нафақат Сурия, балки бир қатор давлатлар ҳам қарши чиққан. Ўзбекистон БМТ доирасида Суриянинг ҳудудий яхлитлигини ёқлаб, Голан тепаликлари бўйича Исроилни бу ҳудуддан чиқиб кетишга даъват этувчи резолюцияларни доимий қўллаб-қувватлаб келади.