Сургундаги ўзбек ёзувчиси Ҳамид Исмоилов Нобел мукофотига номзодлар рўйхатига қўшилди

Сургундаги ўзбек ёзувчиси Ҳамид Исмоилов 2026 йилги адабиёт бўйича Нобел мукофотига номзодлар рўйхатига киритилди. Бу рўйхатдан, шунингдек, Ҳаруки Мураками, Маргарет Этвуд, Салмон Рушдий, Давид Гроссман, Ж.К. Роулинг ва Стивен Кинг каби халқаро миқёсда танилган муаллифлар ҳам жой олган.

Исмоилов ўзбек ва рус тилларида ижод қилади, унинг асарлари инглиз, турк, немис ва француз тилларига таржима қилинган. 2019 йилда у «Жинлар базми» романи учун ТРТБ (EBRD) Адабиёт мукофотини қўлга киритган эди. Унинг «Биз компьютерлармиз» китоби эса 2026 йилги ТРТБ Адабиёт мукофотининг саралаш рўйхатига (shortlist) киритилган.

Шоир, ёзувчи ва журналист 1954 йил 5 майда Қирғизистоннинг Фрунзе (ҳозирги Чўй) вилояти Тўқмоқ шаҳрида, миллати ўзбек бўлган оилада туғилган. Исмоилов ҳарбий алоқа билим юртини тамомлаган, кейинчалик Тошкент давлат университетининг бир нечта факультетларида, жумладан, биология, ҳуқуқшунослик ва бошқарув йўналишларида таҳсил олган.

Исмоилов 1992 йилда Ўзбекистонни тарк этган ва ўшандан бери Лондонда яшайди. 2006 йилда унинг «Темир йўл» романи таниқли таржимон Роберт Чандлер томонидан инглиз тилига таржима қилиниб, Лондонда нашр этилган. Унинг шеърлари Ингеборг Балдауф ва Зигрид Клайнмихел томонидан немис тилига таржима қилинган.

Исмоиловнинг китоблари марҳум Президент Ислом Каримов даврида Ўзбекистонда тақиқланган эди ва халқаро адабий нашрлар ҳамда унинг ноширларига кўра, улар бугунги кунда ҳам тақиқ остида қолмоқда. У 1992 йилда расмийлар уни «номуносиб демократик мойилликлар»да айблаганидан кейин мамлакатни тарк этган.

2026 йилги адабиёт бўйича Нобел мукофоти ғолиби 8 октябрь, пайшанба куни Стокгольмда эълон қилинади. Ғолиб 12 миллион Швеция кронаси (тахминан 1,2 миллион доллар) миқдоридаги пул мукофотини қўлга киритади. Тақдирлаш маросими 10 декабрь куни бўлиб ўтади.

Ўтган йилги мукофот венгриялик ёзувчи Ласло Краснахоркаига насиб этган эди.