Сунъий интеллект "Мен робот эмасман" ўйинининг барча 48 босқичидан ўтди. Видео

Сунъий интеллект «Мен робот эмасман» ўйинининг барча 48 босқичидан ўтди. Видео

GPT-6 Astra модели Нил Агарвал томонидан ишлаб чиқилган I’m Not a Robot ўйинининг барча 48 босқичидан муваффақиятли ўтишга муваффақ бўлди. Ушбу ўйин светофорларни танлаш ва объектларни қидиришдан тортиб, бошқотирмаларни ечиш ва координацияга оид топшириқларни бажаришгача бўлган турли хил CAPTCHA турларини такрорлайди.

Ўйиндан ўтиш тасвирланган видеони 7 сентябрь куни дастурчи Шариф Шамим жойлаштирди. Ўйиндан ўтиш учун Astra модели интерфейс билан мустақил ишлаш: экрандаги таркибни таниш, тугмаларни босиш, элементларни судраб ўтказиш ва маълумотларни киритиш имконини берувчи Computer Use функциясидан фойдаланди.

Барча босқичларнинг муваффақиятли якунлангани сунъий интеллектнинг компьютер билан ўзаро алоқа қилиш имкониятлари қанчалик илгарилаб кетганини намойиш этади. Шу билан бирга, мутахассислар бундай тест барча CAPTCHA тизимлари автоматик равишда «бузиб кирилганини» англатмаслигини таъкидламоқдалар: реал ҳимоя тизимлари қўшимча текширув усулларини қўллайди ва доимий равишда янгиланиб боради.

Бундай имкониятларнинг ривожланиши одамларни автоматлаштирилган тизимлардан фарқлаш учун CAPTCHA'дан фойдаланувчи сайтлар учун янги чақириқларни юзага келтиради. Агар сунъий интеллект бу каби топшириқларни ишончли тарзда бажара олса, ботлардан ҳимояланиш учун шунчаки «Мен робот эмасман» текширувининг ўзи етарли бўлмай қолади.

Аввалроқ, сунъий интеллект тизимларининг фойдаланувчилар назоратидан чиқиб кетиши ва белгиланган кўрсатмаларни бузиши билан боғлиқ ҳодисалар сони рекорд даражага етган эди. 2026 йилнинг июль ойида 300 дан ортиқ шундай ҳолат қайд этилган бўлиб, бу бир ой олдингига нисбатан деярли икки баравар кўпдир.