СУМ яқинидаги Брассерие Парк терассаси ходим ва курер ўртасидаги можародан сўнг демонтаж қилинди
Тошкентда пиёдалар ҳаракатини чеклаган Брассерие Парк ресторанининг терассаси демонтаж қилинди. Бу ресторан вакили ва тротуар бўйлаб ҳаракатланган курер можаросидан сўнг юз берди. Ходим вояга етмаган курерни сўккан ва таҳдид қилган. Столлар ўрнатилган ёзги майдон бир неча йилдан бери мавжуд эди.
СУМ яқинидаги Брассерие Парк терассаси ходим ва курер ўртасидаги можаро ортидан демонтаж қилинди
Тошкентдаги Марказий универмаг (СУМ) олдида, тротуарда жойлашган терасса устидан ўтиб кетаётган вояга етмаган курерга Брассерие Парк ресторани вакили ҳақоратли сўзлар айтиб, уриш билан таҳдид қилган.
Ходим курернинг ортидан югуриб келиб, унга қарата: “Бўлди, бор, хоҳласанг, битта шапалоқ ҳам қўйиб юбораман… Телефон билан қўрқитаман деб ўйлаяпсанми? Фаросатни ишлат, бу ерда одамлар овқатланяпти, скутерда келяпсан… Овқатланиб ўтирган жойингда скутер билан ўтиб кетишса, сенга ғалати бўлмайдими… Тушиб ўт. Тушиб, суриб ўтиб кетиш керак деган қонун борми сизларда? Камеранг билан қўрқитма… Йўқол бу ердан, иккинчи марта бу ердан ўтма”, — деган.
Курер эса вазиятни тушунтириш мумкинлигини ва аллақачон узр сўраганини билдирган.
Бу ёзги майдон шу ерда бир неча йилдан бери мавжуд бўлган.
Пойтахт ҳокимлиги якшанба куни ўтказилган текширувда ҳудуддан фойдаланиш, жумладан, пиёдаларнинг эркин ҳаракатланишини таъминлаш талаблари бузилганини маълум қилди.
“Тегишли чоралар кўрилди. Ҳудуд қонунчилик талабларига мувофиқ ҳолга келтирилди”, — дейилади хабарда.
“Қулай шаҳар барпо этиш — ҳокимликнинг асосий вазифаларидан бири. Биз шаҳар муҳити аҳоли учун қулай бўлиши, тадбиркорлар эса белгиланган талабларга риоя этган ва ҳамшаҳарлар ҳуқуқларини ҳурмат қилган ҳолда ўз ишини ривожлантира олиши учун интиламиз. Пиёдаларнинг қулайлиги ва хавфсизлиги шаҳар муҳитини ташкил этишдаги устувор йўналишлардан биридир.
Жамоат жойлари аҳоли учун очиқ бўлиб қолиши шарт”, — дейилади ҳокимлик хабарида.
Тошкент шаҳри ИИББ маълумотига кўра, 36 ёшли ресторан вакили ва 17 ёшли курер ўртасидаги можаро 17-октабр куни соат 13:00 атрофида юз берган.
Муассаса вакили С. Р. “жамиятда юриш-туриш қоидаларини қасддан менсимасдан, [вояга етмаган шахсга] нисбатан қўпол муносабатда бўлган ва жамоат тартибини бузган”, дейилади ИИББ хабарида.
Эркакка нисбатан Маъмурий жавобгарлик тўғрисидаги кодексининг 183-моддаси (Майда безорилик) бўйича маъмурий баённома расмийлаштирилди. Тўпланган ҳужжатлар жиноят ишлари бўйича Миробод туман судига юборилган.