Суданда икки йиллик комендантлик соати ва фавқулодда ҳолат режими бекор қилинди

Судан ҳукумати пойтахт Хартумда икки йил аввал жорий этилган комендантлик соати ва фавқулодда ҳолат режимини бекор қилди. Бу ҳақда 27-август куни ҳукуматнинг Хавфсизлик масалаларини мувофиқлаштириш қўмитаси маълум қилди.

Судан ОАВларига кўра, қўмита 2024-йилда жорий қилинган фавқулодда ҳолат режимини биринчи марта бекор қилган. Эндиликда Хартум аҳолиси сутканинг исталган вақтида эркин ҳаракатланиши ва ишлаши мумкин.

Бироқ, Хартум губернатори Аҳмад Осубон Ҳамза раислигида ўтказилган йиғилишдан сўнг, қўмита айрим чекловларни тушунтириб ўтди. Унга кўра, хавфсизлик назорат-ўтказиш пунктлари ва армия патруллари ўз фаолиятини давом эттиради. Шунингдек, қўмита тунда йўлга чиқувчи фуқароларни ёнида шахсини тасдиқловчи ҳужжатларни олиб юришга чақирди.

Бундан ташқари, қўмита хорижий фуқароларнинг Хартум штатига киришини тақиқлади. Фақат амалдаги кириш визаси ёки рухсатномасига эга бўлган чет элликларгина жамоат ёки шахсий транспортда (жумладан, поезд ва автобусларда) кириши мумкин. Қўмита ҳайдовчилар ва транспорт компанияларини огоҳлантириб, бу қоидаларни бузганлар жазоланишини билдирди.

Комендантлик соати илк бор 2024-йилнинг май ойида жорий этилган эди. Ўшанда Судан армияси ва ҳарбийлаштирилган “Тезкор ёрдам кучлари” (ТЙК) ўртасидаги низо сабаб хавфсизлик ёмонлашган эди.

Комендантлик соати соат 23:00 дан 05:00 гача одамлар ва транспорт воситаларининг ҳаракатини чеклаганди. Шунингдек, соат 22:00 дан 05:00 гача барча тижорат қатновлари ҳамда пиёдалар ҳаракати тақиқланган эди.

Суданда 2023-йилнинг апрел ойидан бери армия ва ТЙК ўртасида низо давом этмоқда. БМТ ва халқаро ташкилотлар баҳосига кўра, давом этаётган уруш оқибатида ўн минглаб одамлар ҳалок бўлган, 13 миллионга яқин киши эса ўз уйини ташлаб кетишга мажбур бўлган.

Аввалроқ Суданда суд биносига қилинган дрон ҳужуми оқибатида камида 35 киши ҳалок бўлгани ҳақида хабар берилганди. Ал-Завия Гара қишлоғидаги обьектга берилган зарба мамлакат армияси томонидан амалга оширилганди.