Суд Трамп ишдан олган прокурорни лавозимида қолдирди
АҚШ федерал судяси Стенли Бастиан президент Доналд Трамп округ суди тайинлаган федерал прокурорни бир томонлама ишдан бўшата олмаслиги ҳақида қарор чиқарди. Суд Трамп лавозимидан олган Рожер Рогофф ҳамон қонуний прокурор эканини, унинг ўрнига тайинланган шахс эса тегишли ваколатларга эга эмаслигини билдирди.
**Суд Трамп ишдан олган прокурорни лавозимида қолдирди**
ДВ нашрининг Политисўга таяниб хабар беришича, суд қарори ҳақида 1-октабр, пайшанба куни маълум қилинган. Қарор Вашингтон штатининг Ғарбий округи федерал прокурори лавозимидан бўшатилган Рожер Рогоффнинг даъвоси асосида чиқарилган.
Округ суди Рогоффни шу лавозимга тайинлаганидан кўп ўтмай, Трамп уни ишдан олиб, ўрнига ўзига содиқ Чарлз Нил Флойдни қўйган.
Судя Бастианнинг айтишича, бундай алмаштиришлар Конституция ва қонунларда белгиланган тизимга зид. Бу тизим президентнинг мансабдорларни тайинлаш ҳуқуқи билан Сенатнинг номзодларни тасдиқлаш ваколати ўртасидаги мувозанатни таъминлайди.
Суд Рогофф 15-июл куни қасамёд қилганидан бери федерал прокурор лавозимини қонуний равишда эгаллаб келаётганини қайд этди. Президент маъмурияти унинг ўрнига белгиланган тартибга зид равишда тайинлаган Флойд эса бу лавозим ваколатларига эга эмас, деган хулоса қилинди.
Бастиан, шунингдек, АҚШ бош прокурори Тодд Бланш ва Адлия вазирлигига Рогоффни ишдан бўшатилган ёки лавозимидан четлатилган деб ҳисоблашни, унинг хизмат вазифаларини бажаришига тўсқинлик қилишни тақиқлади. Улар мазкур округ прокурори сифатида Рогоффдан бошқа шахсни тан олмаслиги керак.
Адлия вазирлиги қарор устидан шикоят қилишини ва апелляция кўриб чиқилаётган пайтда унинг ижросини тўхтатиб туришни сўрашини билдирди.
Политисўнинг ёзишича, Трамп маъмурияти президентга содиқ шахсларни юқори лавозимларга тайинлаш учун Сенат тасдиғидан ўтиш тартибини бир неча бор четлаб ўтишга уринган.
Нашр қайд этишича, округ судялари ўз ваколатларидан фойдаланиб федерал прокурор лавозимига бошқа номзодни танлаган ҳолатларда Трамп ўша шахсни ишдан бўшатган.
Хабарда келтирилган тартибга кўра, федерал прокурорликка номзодни АҚШ президенти илгари суради, Сенат эса уни тасдиқлайди.