Стив Ирвиннинг оиласи тўсатдан юз берган ўлимдан 20 йил ўтиб, «суперқаҳрамон» отани хотирламоқда
Австралиялик машҳур шахс 2006 йилда, суратга олиш ишлари пайтида скат тикани унинг кўкрагига санчилиши оқибатида ҳалок бўлган эди.
Стив Ирвиннинг оиласи унинг фожиали ўлимидан 20 йил ўтиб, «суперқаҳрамон» отасини хотирлади
Австралиялик табиат ҳимоячиси Бинди Ирвин машҳур отаси — кўпчиликка «Тимсоҳлар овчиси» сифатида танилган Стив Ирвин вафотининг 20 йиллиги муносабати билан унга бағишланган самимий хотираларини ўртоқлашди.
Стив Ирвин 2006 йил 4 сентябрда, 44 ёшида, Катта тўсиқ рифида ҳужжатли фильм суратга олиш пайтида сув остида скат (тиканли балиқ) кўкрагига шикаст етказиши оқибатида ҳалок бўлган эди.
Отаси вафот этганида саккиз ёшда бўлган Бинди жума куни ижтимоий тармоқдаги постида Стивни «суперқаҳрамон» деб таърифлади ва сўнгги йигирма йил давомида «оиласи билан бирга бутун дунё отаси учун мотам тутганини кузатганини» айтди.
«Мен доим отамнинг мероси ёввойи табиатни муҳофаза қилиш деб ўйлардим; аслида эса унинг мероси севги экан. Сайёрамизга ва бир-биримизга бўлган севги», — деб ёзди 28 ёшли Бинди Instagram саҳифасида.
У отасининг ўлими онаси Терри ва 22 ёшли укаси Робертга қандай таъсир қилгани ҳақида гапирди.
«Онам ҳаётининг мазмуни бўлган инсонини йўқотди; укам ва мен эса энг буюк отадан айрилдик», — деб ёзди у. «Қайғу бизни ҳеч қачон бутунлай тарк этмайди; биз ҳар куни у билан бирга яшаймиз».
Бинди, шунингдек, қизи ҳеч қачон кўрмаган бобоси билан ўзини қандай боғлиқ ҳис қилиши ҳақида сўзлаб берди.
«Менинг 5 ёшли қизим бор, у ҳар тонгда унинг ҳужжатли фильмларини томоша қилади. У ўз „тимсоҳ бобоси“ни ҳеч қачон кўрмаган бўлса-да, унинг чексиз меҳрини ҳис қилади».
Стивнинг ўлимидан бери Ирвинлар оиласи Квинсленддаги «Australia Zoo» ҳайвонот боғини бошқаришда давом этмоқда.
«Отам шу қадар чуқур ва унутилмас из қолдирдики, бунинг акс-садоси авлодлар оша янграйверади», — деб ёзди Бинди ва унинг ҳаёти ҳамда мероси «нишонланишга лойиқ» эканини таъкидлади.
У Стивга оиланинг «қўриқчи фариштаси» бўлгани учун миннатдорчилик билдирди ва ўз мактубини уни «бутун қалби билан» яхши кўришини айтиб якунлади.
Стивнинг рафиқаси Терри ҳам ушбу кун муносабати билан ижтимоий тармоқларда пост қолдирди ва унда доим ҳарбий рангдаги (хаки) кийимда юрадиган табиат ҳимоячиси Биндининг туғилиши ва бу унга қандай таъсир қилгани ҳақида гапирган интервьюсини улашди.
«Ҳаётимдаги энг ажойиб ёввойи табиат билан учрашув — бу қизим Биндининг туғилиши бўлган», — дейди Стив интервьюда ўзига хос ғайрат билан.
У янги туғилган чақалоғини илк бор қўлига олганида, унга исм қўйиш ғояси пайдо бўлган.
«Мен ҳайратда қолдим ва ўшанда унинг исми дунёга келди. Мен севимли тимсоҳим Бинди шарафига „Бинди!“ деб юбордим», — деди у кенг табассум билан.
Роберт Ирвин ҳам отасини хотирлаб, Стив уни гўдаклигида қўлида ушлаб турган суратни жойлаштирди ва унга «Сенинг меросинг абадийдир» деб изоҳ қолдирди.
Роберт опаси худди шу унвонни қўлга киритганидан ўн йил ўтиб, АҚШнинг «Dancing with the Stars» (Юлдузлар билан рақс) рақс танлови ғолиби деб топилди.