«Спарк»даги 200 та пакет: текширув ортидан 1,2 килограммдан зиёд наркотик топилди
Тошкентга кириб келаётган «Спарк» йўловчисидан 200 та пакетга қадоқланган синтетик наркотик топилди. Кейинчалик у вақтинча яшаб турган хонадон ҳам текширилиб, икки манзилдан жами 1 килограмм 207 грамм гиёҳвандлик моддаси олинди.
«Спарк»даги 200 та пакет: текширувдан сўнг 1,2 килограммдан ортиқ наркотик аниқланди
Давлат хавфсизлик хизматининг Тошкент шаҳар бўйича бошқармаси ва шаҳар ИИББ ходимлари ҳамкорлигида ўтказилган тезкор тадбирда автомобил Юнусобод туманидаги «Уч қаҳрамон» ЙПХ масканида тўхтатилди.
Текширув вақтида машинада йўловчи сифатида кетаётган, 2004-йилда Сурхондарё вилоятида туғилган шахсга тегишли селлофан пакетдан 200 та зип-пакетга қадоқланган жами 365 грамм «Мефедрон» топилди. Моддалар ашёвий далил сифатида олинди.
Тадбир давомида унинг Тошкент туманида вақтинча яшаб турган хонадони ҳам кўздан кечирилди. У ердан яна 734 грамм «Мефедрон», 63 грамм «Алфа-ПВП» ва 45 грамм «Спайс» аниқланди.
Шунингдек, хонадондан иккита электрон тарози, зип-пакетлар ва бошқа ашёлар процессуал тартибда расмийлаштириб олинди.
Хабарда қайд этилишича, мазкур шахс муқаддам ўғирлик билан боғлиқ жиноят учун судланган. Тезкор тадбир маълумотларига кўра, у интернет орқали наркотик сотувчи дўконда моддаларни яширин жойларга қолдириб кетувчи — «закладчик» сифатида фаолият юритган.
Ҳолат юзасидан унга нисбатан жиноят иши қўзғатилган. Тергов ҳаракатлари давом этмоқда.