Сўнгги дақиқада берилган огоҳлантириш мингга яқин непаллик ўқувчининг ҳаётини сақлаб қолди

**Сўнгги дақиқадаги огоҳлантириш мингга яқин непаллик ўқувчининг ҳаётини сақлаб қолди**

Непалда содир бўлган кўчки ва тошқинлар натижасида қурбонлар сони 903 нафарга етди. Тўрт мингга яқин киши бедарак йўқолган бир пайтда, мингга яқин ўқувчининг ҳаёти сақлаб қолинган воқеа Реутерс агентлиги эътиборини тортди.

Бу ҳодиса мамлакатнинг Бидур шаҳрида юз берган. Мактаб ҳисобчисининг ўз вақтида берган огоҳлантириши туфайли таълим муассасаси фожиадан олдин эвакуация қилинган.

Воқеа Трибҳуван Тришули ўрта мактабида содир бўлган. Ўша пайтда директор Ражендра Давади дарс ўтаётган эди. Шу лаҳзада ҳисобчи хонага шошилиб кириб, "Тошқин келяпти, тошқин келяпти!" дея бақирган.

Ҳисобчи бу хабарни Расувадаги қариндошидан олган. Расува табиий офатдан биринчи бўлиб зарар кўрган ҳудудлардан бири эди. Шундан сўнг мактаб раҳбарияти дарсларни зудлик билан тўхтатиб, ўқувчиларни эвакуация қилишни бошлаган. Уларда бунинг учун атиги 14 дақиқа вақт бўлган. Ўқувчилар муассасани шошилинч тарк этаётган бир пайтда, водий юқорисидан улкан лойқа сув оқими пастга қараб ҳаракатланаётган эди. У ўз йўлида учраган бутун бошли аҳоли масканларини оқизиб кетган.

Дастлабки огоҳлантириш берилган пайтда 1600 ўқувчининг қарийб 1000 нафари мактаб ҳудудида бўлган. Директор Давадининг айтишича, камида бир ўқувчи ваҳима сабаб ҳушидан кетган. Ота-оналар эса фарзандларини олиб кетиш учун мотосикллар билан шошилинч равишда мактабга келган. Айрим ўқувчилар хавфсиз ҳудудга автобусларда олиб кетилган, бошқалари эса пиёда юриб баландроқ жойларга чиққан. Тахминан 14 дақиқадан сўнг, охирги автобус яқин атрофдаги кўприкдан ўтиб улгурган.

Мактаб директори муассаса тошқин сабаб бутунлай вайрон бўлганини айтди. У 2015-йилда Непалда юз берган даҳшатли зилзиладан кейин қайта қурилганди. Ўшанда табиий офат қарийб 9 минг кишини ҳаётдан олиб кетган. Мактаб Тришули дарёси ва гидроелектр канали ўртасидаги тор ҳудудда жойлашган.

Қарийб 1000 нафар ўқувчининг ҳаётини сақлаб қолган ҳисобчи ўз ота-онасини қутқариш учун дарҳол уйига югурган. У отасини тепаликка олиб чиқишга муваффақ бўлган. Кейин эса онасини қутқариш учун ортга қайтган ва даҳшатли манзарага дуч келган: тошқин унинг уйини оқизиб кетганди.

**Мактаб қайта қурилади. Бу сафар хавфсиз ҳудудда**

Директор Ражендра Давадининг айтишича, ушбу таълим даргоҳи узоқ йиллик тарихга эга. Ҳатто унинг ўзи ҳам шу ерда таҳсил олган. Мулозим мактаб имкон қадар тезроқ, энг муҳими хавфсизроқ ҳудудда қайта қурилишига умид билдирмоқда.

Непалда юз берган ушбу табиий офат қурбонлари сони ортиб бормоқда. Тўрт минг нафарга яқин инсонлар бедарак йўқолгани айтилмоқда. Бироқ ўз вақтида берилган огоҳлантириш ҳалок бўлганлар рўйхатига яна юзлаб болалар қўшилишининг олдини олган.