Сочи яқинида нефт танкери ёнди: пляжлар ёпилиб, аҳолига деразаларни очмаслик сўралди
Қора денгизда, Сочи соҳиллари яқинида АФРАМАХ РИО нефт танкерида ёнғин чиқди. Ҳодиса сабабли «Сириус» ҳудудидаги пляжлар вақтинча ёпилди, аҳолига кўчада узоқ қолмаслик ва имкони борича деразаларни очмаслик тавсия этилди. Кемадаги 23 нафар экипаж аъзоси қутқарилган.
Сочи яқинида нефт танкери ёниб кетди: пляжлар ёпилди, аҳолига деразаларни очмаслик тавсия қилинди
Ёнғин юз бергани ҳақида 6-октабр куни «Сириус» федерал ҳудуди маъмурияти раҳбари Дмитрий Плишкин хабар берди.
Россия Транспорт вазирлиги маълумотига кўра, Либерия байроғи остида нефт ташиётган танкерга экипажсиз катерлар ҳужум қилган. Вазирлик денгиз акваториясида нефт ёнаётганини маълум қилган.
Идора изоҳига кўра, қутқарув кемалари танкерга хавфсиз яқинлаша олиши учун олов кучи пасайишини кутиш керак. Шундан кейингина ёнғинни ўчириш ишларига киришиш мумкин бўлади. Вазирлик ҳодиса оқибатларини бартараф этиш учун етарли куч ва воситалар мавжудлигини таъкидлаган.
Транспорт вазирлиги берган маълумотга кўра, экипажнинг барча 23 аъзоси Ҳиндистон фуқаролари бўлиб, улар қутқарилган. Аввал Маш Телеграм-канали икки киши жароҳат олганини ёзган эди. Аммо вазирликнинг кейинги баёнотида дастлабки маълумотларга кўра жабрланганлар йўқлиги айтилган.
Астра нашрига кўра, АФРАМАХ РИО 100 минг тоннагача нефт ташиш имкониятига эга. Маш эса танкер Новороссийскдан Ҳиндистонга хом нефт олиб кетаётганини ва деярли тўлиқ юкланганини ёзган.
Тҳе Инсидер нашри кеманинг Россия «соя флоти»га алоқадор бўлиши мумкинлигини билдирган. ДВ маълумотига кўра, танкер Европа Иттифоқи ва АҚШ санксия рўйхатларига киритилмаган, бироқ Украина унга нисбатан чекловлар жорий қилган.
Ҳодиса Қора денгизда кемаларга ҳужумларни тўхтатиш бўйича илгари билдирилган таклифлар фонида юз берди. Туркия ташқи ишлар вазири Ҳоқон Фидан 8-август куни Анқара Россия ва Украинага денгиздаги кемаларга зарбалар беришга мораторий жорий этишни таклиф қилганини айтган эди.
Бироқ 14-августда Россия ТИВ расмий вакили Мария Захарова Москва бундай сулҳга рози бўлиш учун асос кўрмаётганини билдирган. У Туркиядан расмий мурожаат келмаганини ҳам таъкидлаган.