Соч тўкилиши, оёқ ва бел оғриғи — юрак касаллигидан дарак берувчи 5 та белги

**Соч тўкилиши, оёқ ва бел оғриғи — юрак касаллигидан дарак берувчи 5 та белги**

Юрак касаллиги дунё бўйича ўлимнинг асосий сабаби ҳисобланади. Юрак хуружининг бошланишини вақтида пайқаш ва шифокор билан маслаҳатлашиш жуда муҳим. Юрак-қон томир касалликларининг олдини олиш қоидаларини билиш саломатлик учун катта аҳамиятга эга.

**Соч тўкилиши**

Ишониш қийин бўлса-да, эркаклар ва аёлларда эрта соч тўкилиши артерияларнинг тиқилиб қолиши ҳамда қон ивиш хавфининг юқорилиги билан боғлиқ бўлиши мумкин. Масалан, 37 000 эркак иштирок этган тадқиқот натижалари соч тўкилиши билан юрак-қон томир касалликлари ривожланиши ўртасидаги алоқани тасдиқлаган. 4000 дан ортиқ аёл қатнашган яна бир тадқиқот эса бу белги аёлларда ҳам учрашини кўрсатган. Шу сабабли, соч тўкилиши аввалгидан кўпроқ кузатилса, кардиолог томонидан мунтазам текширувдан ўтиш тавсия этилади.

**Қулоқ бурмаси**

Юрак ишемик касаллигининг яна бир белгиси — қулоқдаги бурма ёки ажинлардир. Бу аломат сўнгги ўн йилликларда ўтказилган кўплаб тадқиқотларда қайд этилган. Шифокорлар айтишича, асосий муаммо қон таъминотининг ёмонлашувида: артериялар тиқилиб қолиши сабаб қон яхши ҳайдалмайди ва организм аввало муҳим органларни кислород билан таъминлашга уринади, қолган органларга эса кислород етиб бориши қийинлашади.

**Оёқларда оғриқ**

Айниқса, чекувчилар бу белгига жиддий эътибор бериши керак: қон таъминоти ёмонлашгани сабаб пастки экстремиталарнинг артериялари тиқилиб қолади ва оёқдаги кескин оғриқ оқсоқланиш ёки йиқилиб кетишга олиб келиши мумкин. Бундай ҳолат юз берса, шифокор кўригидан ўтиш, шунингдек, кўпроқ сабзавот истеъмол қилиш ва пиёда юришга ҳаракат қилиш лозим.

**Бўйин ва жағда оғриқ**

Бу ҳар бир аёл билиши керак бўлган жуда муҳим аломатдир: аслида аёлларда юрак хуружининг дастлабки белгиларидан бири кўкрак қафасида эмас, балки бўйин ёки жағдаги оғриқ бўлиши мумкин. Афсуски, шу сабаб аёллар кўпинча шифокорга жуда кеч мурожаат қилади, чунки улар юрак хуружидан шубҳаланмайди. Ёдда тутиш керак, бўйин ёки жағдаги оғриқлар кардиологга мурожаат қилиш учун муҳим сабабдир.

**Бел оғриғи**

Ишемик юрак касаллигининг яна бир ноодатий, аммо жуда кенг тарқалган аломати — бел оғриғи. Қон айланишининг етишмаслиги дискларни заифлаштириши ва умуртқа поғонасидаги босимни ошириши мумкин, натижада бел соҳасида оғриқ пайдо бўлади. Агар бел оғриғи тез-тез кузатилса, кардиолог билан маслаҳатлашиб, ундан кардиограмма ёки юракнинг ултратовуш текширувини буюришини сўраш мақсадга мувофиқдир.