Словенияда Исроилнинг илк элчихонаси очилди. Люблянада халқ норозилик намойишига чиқди (видео)
Словенияда Исроилнинг биринчи элчихонаси иш бошлади. Люблянада эса одамлар бунга қарши норозилик намойишига чиқди (видео)
9-сентябр куни Словенияда Исроилнинг илк элчихонаси очилди. Пойтахт Люблянада минглаб одамлар бунга эътироз билдириб кўчаларга чиқди.
Маълумотларга кўра, намойиш миллатчи бош вазир Янес Янсанинг Исроил билан алоқаларни қайта тиклаш сиёсатига қарши йўналтирилган. Бу собиқ бош вазир Роберт Голоб олиб борган сиёсатга мутлақо зид қадам бўлди. Голоб ҳукумати Исроилнинг Ғазодаги урушини “геноцид” деб атаган эди. Янса июл ойида бу лавозимга киришганди.
Люблянада минглаб намойищилар элчихона очилаётган меҳмонхона ёнидан ҳам ўтиб кетди. Улар “Биз тинчлик тарафдоримиз ва Фаластин билан биргамиз” ҳамда “Геноцид ўзини мудофаа қилиш эмас”, деган ёзувлар туширилган плакатларни кўтариб чиқди.
48 ёшли санъацҳунос Уршка Брезник Янса ҳукуматини хиёнатда айблади. Яна бир намойищи Мелина Саҳерник эса АФП агентлигига “Бу воқеа Словенияни жуда ёмон кўрсатади” деди.
Дело газетаси июн ойида ўтказган сўровга кўра, словенияликларнинг 56 фоизи Исроил билан яқинлашишга қарши чиққан. Фақат 14 фоизи буни қўллаб-қувватлаган. Словениялик сиёсий таҳлилчи Андраз Зорко Ассосиатед Пресс агентлигига фикр билдирди. Унинг айтишича, ҳукумат сиёсатидаги ўзгариш 2 миллион кишилик аҳолининг умумий қарашларига мос келмайди.
“Словения жамоатчилигининг кўпчилиги ё Исроилга қарши, ё холис позицияда турибди”, деди у.
Собиқ бош вазир Голоб бощилигидаги либерал “Озодлик ҳаракати” ва “Сўллар” партияси 9-сентябр куни парламентга таклиф киритди. Улар Янсага импичмент эълон қилишни сўрамоқда. Бунга бош вазирнинг фақат Исроил манфаатларига хизмат қилаётган ташқи сиёсати сабаб қилиб кўрсатилди.
Партиялар ташқи ишлар вазири Тоне Кайзерни ҳам лавозимидан четлатишни талаб қилди. Улар элчихона очилишини Исроилнинг март ойидаги сайловларда Янсага кўрсатган ёрдами учун жавоб қайтариш деб баҳолади.
Голоб раҳбарлиги даврида Словения Фаластин давлатини тан олган эди. Шунингдек, Исроилга қурол эмбаргоси қўйилган, босиб олинган Ғарбий Соҳилдаги ноқонуний яҳудий аҳоли пунктларидан маҳсулот импорт қилиш тақиқланган ҳамда Исроилнинг юқори мартабали расмийлари, жумладан бош вазир Бинямин Нетаняхунинг мамлакатга кириши ман этилган эди.
Янса ҳокимиятга келиши билан Словения ҳукумати биносидан Фаластин байроғини олиб ташлади. Аввал бу байроқ Словения, Европа Иттифоқи ва Украина байроқлари ёнида турган эди. Тез орада унинг ҳукумати Исроилга қарши барча чекловларни бекор қилди.
Ташқи ишлар вазирлигининг Х тармоғидаги хабарига кўра, элчихона очилишида вазир Кайзер нутқ сўзлади. У бу воқеа мулоқот ва яқин ҳамкорлик даврининг бошланиши бўлишини айтди.
Тадбирда қатнашиш учун Словенияга келган Исроил ташқи ишлар вазири Гидеон Саар матбуот анжуманида буни тарихий кун деб атади.
“Бу Исроилнинг дўстлигимизга ҳамда унинг келажагига бўлган садоқатининг ёрқин ифодасидир”, деди Саар ва Словения ҳукумати ҳамда Янсага дўстлик учун миннатдорчилик билдирди.
Элчихона очилишидан бир кун олдин Буюк Британия ва яна 11 та давлат босиб олинган Ғарбий Соҳилдаги яҳудийлар ноқонуний пунктлари билан савдо қилишни тақиқлаган эди. Бу Ғазодаги уруш сабаб Исроил ҳукуматининг халқаро майдонда яккаланиб бораётганини кўрсатмоқда. Исроил бунга кескин жавоб бериб, Шарқий Қуддусдаги Буюк Британия консуллигини ёпишини маълум қилди.