«Сиз – менинг президентим эмассиз». 26 ёшли актёр Путинга мурожаат йўллади

**«Сиз – менинг президентим эмассиз»: 26 ёшли актёр Путинга мурожаат йўллади**

Сергей Безруков раҳбарлигидаги театрда фаолият юритувчи 26 ёшли актёр Алексей Ярмущик 28-июл куни эрталаб ўзининг Инстаграм саҳифасида Россия Федерацияси президенти Владимир Путинга йўлланган видеони эълон қилди. Унда у Путиннинг ўз президенти эмаслигини ва Қрим «бизники эмас»лигини таъкидлаган. Ярмущикнинг ушбу видеоси интернетда тез тарқалиб, икки кун ичида бир ярим миллиондан ортиқ кўрилган ва 65 мингдан зиёд лайк тўплаган.

**У нималар деган?**

Актёр Путинга мурожаатида шундай дейди: «Мен ҳозир ухлай олмадим, мен сизга айтмоқчиман: мен ҳар куни, ҳар тун сиз билан хаёлан гаплашаман».

Ярмущик сўзида давом этиб: «Мен сиз менинг президентим бўлишингизни истамайман. Ҳеч қачон. Мен 25 ёшдаман (июн ойида Ярмущик 26 ёшга тўлган)! Сиздан қўрқмайдиган, сиз президенти бўлишингизни истайдиган бирорта тенгдошим йўқ. Ҳозир ўзим билган, интернетда учратган барча ижодкорларни эслаяпман. Биргина Шаман (Ярослав Дронов, Россия ҳукуматини қўллаб-қувватлаши билан танилган қўшиқчи)! Барча хорижий агентларга қарши битта Шаман», – дейди.

У яна бир бор Путин ўзининг президенти бўлишини хоҳламаслигини такрорлаб, уни «бутун ҳукуматни тарқатиб юбориш»га чақиради.

«Мен сиз менинг президентим бўлишингизни истамайман. Бутун ҳукуматни тарқатиб юборинг! Телевизорингизни кўришни хоҳламайман. Ўз қўшиқларимни эшитишни хоҳлайман. Мен «ВК»дан фойдаланишни хоҳламайман, Инстаграмдан фойдаланишни хоҳлайман, чунки у яхшироқ. Ҳа, мен зумерман, сайловларга кам борганман, умуман сиёсатга эътибор бермаганман. Аммо 14 ёшга тўлганимда, инглиз тили дарсига келдим ва ўқитувчим энг яқин дўсти билан Қрим туфайли жанжаллашиб қолганини айтди... Мен Қримни бизники деб ҳисобламайман. Ва бу қандайдир буюк ибора эмас. Бирорта тенгдошим бундай деб ўйламайди. Агар бир вақтлар одамлар шундай деб ҳисоблаган бўлсалар, ҳозир... Нима дейишни ҳам билмай қолдим. Инстаграм лентамдагилар, барча танишларим ё кетишмоқда, ёки шокда, ёки шунчаки бу ҳақда гапиришмайди. Сизни президент сифатида яхши кўрадиган ва ҳурмат қиладиган бу одамлар қаердалигини билмайман. Сиз – менинг президентим эмассиз. Айтмоқчи бўлган гапим шу. Хайрли тун.»

**Кўп ўтмай актёр бошқа видеосида «ҳукуматни ёқтириши ва Путинни ҳурмат қилиши»ни айтди**

Бир неча соат ўтиб Алексей Ярмущик навбатдаги видеони эълон қилди. Унинг сўзларига кўра, онаси унга ҳеч нарсани тушунмаслигини ва Путин мамлакат учун «кўп иш қилгани»ни айтган. Шунингдек, одамларнинг изоҳларини ўқиб берган, унинг нуқтайи назарига қўшилмайдиган бу одамлардаги «меҳрибонлик уни ҳайратга солган».

«Одамларнинг яхшилик билан ёзишлари мени ҳайратда қолдирди. Ниҳоят, менга қарама-қарши бўлган одамларни кўрдим. Лекин улар меҳрибон. Мен жуда ҳаяжонланяпман, йигитлар. Менимча, мен ниманидир тўғри қилдим. <...> Мен бу халқни жуда яхши кўраман, мен аллақачон ҳукуматни ҳам яхши кўраман, мен аллақачон Владимир Владимировични қандайдир... тушунасизми... ҳурмат қиламан, чунки ҳақиқатан ҳам уни қўллаб-қувватлайдиган одамлар бор. Ҳамма гап шунчаки гаплашишда. Шунчаки гаплашиш. <...> Мен шу мамлакатда туғилганимдан фахрланаман», – деган Ярмущик.

«Осторожно, новости» учун берган интервюсида Ярмущик биринчи видеони «ахборот пуфагини ёриб чиқишга уриниш» деб атаган. Шунингдек, оқибатлардан «албатта, чўчиётгани»ни айтган. «Мен 26 ёшдаман. Тенгдошларимнинг барчаси қўрқишади. Путиннинг фамилиясини тилга олган ягона одамман. Бошқалар эса қандайдир қўрқувда», – деган у нашр журналистига.

Унинг сўзларига кўра, бу мурожаатни ёзишига Россияда сафарбарликнинг янги тўлқини бошланиши ҳақидаги миш-мишлар сабаб бўлган. «Мендек ёш йигит учун, бу энг кучли хавотирлардан биридир», – деган актёр.

Алексей Ярмущик 2023-йилда Константин Райкин номидаги Олий саҳна санъати мактабини тамомлаган, шундан сўнг Москва област драма театрида ишлай бошлаган, унинг бадиий раҳбари Сергей Безруков (Сўнгги икки президентлик сайловида Владимир Путиннинг ишончли вакили) ҳисобланади. «Осторожно, новости» нашри ёзишича, 2026-йил июн ойида Ярмущик театрдан бўшаган. У бунга иш ҳақи жуда пастлиги, актёрларни эса «мулк сифатида қабул қилишлари, кўпинча психологик чегараларни бузишлари ва қадр-қимматни камситишлари»ни сабаб қилиб келтирган.

**Боня ва нотаниш ҳарбий ортидан**

Ярмущикнинг Путинга мурожаати сўнгги бир неча ой ичида ижтимоий тармоқларда тарқалган биринчи мурожаат эмас.

Бу видеолар президент рейтинги пасайиши фонида пайдо бўлмоқда: жорий йил баҳоридан бошлаб Россиянинг учта асосий социологик хизмати (ВсИОМ, ФОМ ва «Левада-маркази») Путинга бўлган ишонч ва маъқуллаш даражасининг пасайишини қайд этмоқда.

Апрел ойида Инстаграм юлдузи, Монакода яшовчи Виктория Боня Путинга мурожаат қилиб, россияликлар ундан қўрқишини айтганди. У мамлакатдаги президентдан яширилаётган муаммоларни санаб ўтганди. Бир ҳафта ичида видео деярли 30 миллион марта томоша қилинди.

Кремлнинг расмий вакили Дмитрий Песков ўшанда Бонянинг исмини айтмаган ҳолда, мурожаатда кўтарилган мавзулар «ҳақиқатан ҳам жуда шов-шувли» эканини, аммо бу муаммолар бўйича катта ишлар олиб борилаётганини айтди.

Кремлпараст ОАВ ва блогерлар, жумладан, телебошловчи Владимир Соловёв Боняни кескин танқид қилиб, уни сотқинликда айблади. Видеомурожаат эълон қилинганидан икки ҳафта ўтгач, Боня Соловёвнинг эфирида меҳмон бўлди ва у ерда ҳукумат эътиборсиз қолдираётган масалаларни қайта кўтаришга ҳаракат қилди.

Июн ойида Украинадаги уруш қатнащиси Александр Лунин Путинга мурожаат ёзди. Бунгача унчалик машҳур бўлмаган ҳарбий блогернинг пости бир кунда 12 миллиондан ортиқ кўрилди. У армиядаги муаммоларни муҳокама қилиш учун Путин билан учрашишни талаб қилган ва исён кўтариш билан таҳдид қилган.

Шундан кейин Лунинни экстремистик ёки нацистик рамзларни намойиш қилгани учун 11 суткага ҳибсга олишди. Озодликка чиққанидан сўнг у ўз мурожаатини ўчириб ташлади, Путин билан учрашиш ғоясидан воз кечди ва «махсус ҳарбий амалиёт»га (Россия ҳукумати Украинадаги урушни шундай атайди) қайтиш истагини билдирди.