Сиднейдаги Бонди-Бич ҳужумидан сўнг қуролланган полиция патрулликни бошлади
Янги полиция бўлинмаси ўтган йили Ҳанука байрамида содир бўлган ҳалокатли отишма ҳужумига жавобан кўрилган хавфсизлик чорасидир.
Сиднейда Бонди-бичдаги ҳужумдан сўнг қуролланган полиция патрулликни бошлади
Сидней кўчаларида ўтган йили Бонди-бичда содир бўлган отишмадан сўнг жорий этилган хавфсизликни кучайтириш чоралари доирасида оғир қуролланган полиция ходимлари патруллик қилишни бошлади.
Қуролли жавоб қайтариш қўмондонлиги (ARC) махсус тайёргарликдан ўтган ходимларни одамлар гавжум бўлган сайёҳлик ҳудудларига жойлаштиради, у ерда улар узун сопли милтиқларни кўтариб юришади — бу аксарият аҳоли учун ноодатий манзарадир.
Янги Жанубий Уэльс полициясининг билдиришича, ходимлар, шунингдек, “жиддий таҳдидлар, жумладан, қуролланган ҳужумчилар билан боғлиқ ҳодисаларнинг олдини олиш, уларни бартараф этиш ва уларга тезкорлик билан жавоб қайтариш учун” спорт ўйинлари каби йирик тадбирларда ва ибодат жойларида бўлишади.
Декабрь ойида машҳур пляжда яҳудийларнинг Ханука байрамини нишонлаш тадбирида икки нафар қуролланган шахс ўт очгани оқибатида 15 киши, жумладан, 10 ёшли қизча ҳалок бўлган эди.
Ушбу ҳужум Австралияда охирги деярли 30 йил ичидаги энг кўп одам ўлимига олиб келган оммавий отишма бўлди ва қурол тўғрисидаги қонунларга йирик ўзгартиришлар киритилишига ҳамда нафратни тарғиб қилувчи баёнотларга қарши курашнинг кучайишига олиб келди.
Аҳолидан бири ABC News теле каналига қуролланган полициянинг борлиги “ваҳимали” эканини айтди.
“Улар ҳамма жойда. У қуроллар жуда катта.”
Бироқ бошқа бир аёл эшиттиришда қуролланган полицияни кўриш уни хавфсиз ҳис қилишига сабаб бўлганини айтди.
Янги Жанубий Уэльс полициясининг маълум қилишича, ARC “Сидней бўйлаб яққол кўринадиган ҳолда махсус транспорт воситаларини бошқариши ва милтиқлар кўтариб юриши” назарда тутилган.
Детектив суперинтендант Эндрю Эванснинг айтишича, бундан мақсад “оддий тамойилга — инсон ҳаётини сақлаб қалишга асосланган”.
14 декабрдаги отишма Бош вазир Энтони Альбанезе ҳукуматига жуда катта босим ўтказди ва антисемитизмга қарши тезкор чоралар кўриш талабларини келтириб чиқарди.
Яҳудий жамоалари вақт ўтиши билан 250 нафар ходимни ўз ичига оладиган янги полиция операциясини мамнуният билан кутиб олди, бошқалар эса инсон ҳуқуқларини ҳимоя қилиш учун кафолатлар беришга чақирди.
“Ҳеч бир австралиялик кўчаларимизда ҳарбий қуролга эга ходимларни кўришни хоҳламайди, аммо мурда солинган қопчаларни кўриш бундан анча ёмонроқдир”, деди Австралия яҳудийлари Ижроия кенгаши ҳамраиси Алекс Ривчин.
Amnesty International Australia ташкилоти “полициянинг ҳарбийлаштирилиши”дан хавотирда эканини ва штат ҳукуматидан ARC тинч намойишларни бостириш учун ишлатилмаслиги бўйича кафолатлар сўраганини билдирди.
“Полиция ваколатлари ва имкониятларининг ҳар қандай кенгайтирилиши аниқ, жамоатчилик учун очиқ бўлган қоидалар, мустаҳкам мустақил назорат ва ҳисобдорлик билан бирга олиб борилиши керак”, деди ташкилот вакили Эндрю Уитфорд.
Янги Жанубий Уэльс ҳукумати янги чораларни ҳимоя қилди.
“Дунёимиз абадий ўзгарди. Бу бутун мамлакат бўйлаб шунчаки ҳақиқатдир. Ва мен ўша пайтда айтган эдим, биз ҳеч қачон аввалгидек бўлмаймиз”, деди штат Полиция вазири Ясмин Катли ABC телеканалига.
Гумон қилинаётган қуролли шахслардан бири Навид Акрамга 78 та ҳуқуқбузарлик, жумладан, 15 та қотиллик, 40 та қотилликка суиқасд ва битта террорчилик ҳаракатини содир этиш бўйича айблов қўйилган.
Унинг отаси, 50 ёшли Сажид Акрам ҳам қуролланган бўлиб, Бонди-бичдаги оломонга қарата ўт очган ва воқеа жойида полиция томонидан отиб ўлдирилган.