Си Сзинпин 7 йил ичида илк бор Ҳиндистонга ташриф буюриши мумкин
Си Сзинпин етти йилдан сўнг илк бор Ҳиндистонга бориши мумкин
Хитой Халқ Республикаси раиси Си Сзинпин сентабр ойида Ҳиндистонда бўлиб ўтадиган БРИСС саммитида иштирок этиши кутилмоқда. Бу унинг сўнгги етти йил ичида Ҳиндистонга биринчи ташрифи бўлиши мумкин. Реутерс агентлиги уч нафар ҳиндистонлик манбага таяниб хабар беришича, бу ташриф икки давлат ўртасидаги муносабатларни яхшилашга қаратилган саъй-ҳаракатлар фонида муҳим аҳамият касб этади.
Ҳиндистон 12–13-сентабр кунлари Ню Деҳлида БРИСС саммитига мезбонлик қилади. Манбаларга кўра, Хитой раҳбари Ҳиндистонга тахминан 400 нафар амалдордан иборат делегация билан келиши мумкин. Бу 2019-йилдаги ташрифга нисбатан икки баравардан кўпроқ кўрсаткичдир.
Хитой ва Ҳиндистон ўртасидаги муносабатлар 2020-йилда Ҳимолай тоғларидаги чегара ҳудудида юз берган тўқнашувлардан сўнг бир неча йил давомида кескинлашган эди. Ўша тўқнашувларда 20 нафар ҳиндистонлик ва 4 нафар хитойлик ҳарбий ҳалок бўлган. 2024-йил октабр ойида томонлар қўшинларни чегара ҳудудидан ажратиш бўйича келишувга эришган бўлса-да, чегара масаласи ҳалигача асосий муаммолардан бири бўлиб қолмоқда. 2026-йил июл ойининг охирида икки давлат ҳарбий патруллари чегаранинг чекка ҳудудларидан бирида юзма-юз келгани ҳақида хабарлар тарқалган эди.
БРИСС саммити доирасида Хитой ва Ҳиндистон расмийлари иқтисодий ва бошқа йўналишларда ҳамкорликни кенгайтириш, шунингдек, чегара ва минтақавий хавфсизлик масалаларидаги келишмовчиликларни бошқариш йўлларини муҳокама қилиши кутилмоқда.
Хитой Ташқи ишлар вазирлиги Пекиннинг БРИСС ҳамкорлигига катта аҳамият беришини ва саммитни муваффақиятли ўтказишда Ҳиндистонни қўллаб-қувватлашини билдирган. Бироқ, Си Сзинпиннинг ташрифи бўйича якуний маълумот ҳозирча берилмаган.
Эслатиб ўтамиз, Хитой раиси Си Сзинпин 2026-йил май ойи бошида Шимолий Кореяга давлат ташрифи билан борган эди. Ташриф давомида Ким Чен Ин билан сиёсат, иқтисодиёт ва маданият соҳаларидаги ҳамкорликни кенгайтиришга келишиб олинган.